হৰমুজ প্রণালীক লৈ আমেৰিকাক চৰ্ত আৰোপ ইৰানৰ; গুৰুত্বপূৰ্ণ জলপথটোৰ মুকলিত পুনৰ অনিশ্চয়তা

ডিজিটেল ডেস্ক: বিশ্ব বাণিজ্যৰ অন্যতম গুৰুত্বপূৰ্ণ পথ হৰমুজ প্রণালী মুকলি হোৱাৰ ক্ষেত্ৰত পুনৰ প্রশ্নবোধক চিহ্নৰ সৃষ্টি হৈছে। দিনচেৰেক পূৰ্বে ইৰানৰ বিদেশ মন্ত্র্যালয়ে প্রকাশ কৰিছিল যে দেশখনে ওমানৰে বুজাবুজিৰ পাছতে হৰমুজ প্রণালী পুনৰ মুকলি কৰি দিব। কিন্তু শেহতীয়াকৈ তেহৰান প্রশাসনে হৰমুজ জলপথ মুকলি কৰাৰ ক্ষেত্ৰত আমেৰিকাক কেইবাটাও চৰ্ত পূৰণৰ দাবী জনাইছে। ইৰানৰ ৰাষ্ট্ৰীয় নিৰাপত্তা পৰিষদে প্রকাশ কৰিছে যে আমেৰিকা যুক্তৰাষ্ট্ৰই যেতিয়ালৈকে নিজৰ স্বভাৱ সলনি নকৰে, তেতিয়ালৈকে হৰমুজ প্রণালী মুকলি কৰা নহ'ব। 

তদুপৰি উল্লেখ কৰে যে আমি আমাৰ দাবীসমূহৰ পৰা আঁতৰি নাহোঁ, লাগিলে পুনৰ যুদ্ধত অৱতীৰ্ণ হ'ম। উল্লেখযোগ্য যে ইৰানে মার্কিন প্রশাসনৰ ওচৰত কেই বাটাও দাবী উত্থাপন কৰিছে। ইৰানৰ ৰাষ্ট্ৰীয় নিৰাপত্তা পৰিষদৰ সচিব মহম্মদ বাঘেৰ জুলঘাদৰৰ মন্তব্যৰ ভিত্তিত দেশখনৰ সংবাদ মাধ্যমে প্রকাশ কৰিছে যে পুনৰ ইৰানক ভাবুকি দিব নোৱাৰিব। তদুপৰি ইৰান আৰু ইয়াৰ সহযোগী দেশসমূহৰ লগত আমেৰিকাই চলাই থকা যুদ্ধখন স্থায়ীভাবে বন্ধ কৰিব লাগিব। 

আনফালে ইৰানৰ বন্দৰসমূহত মার্কিন অৱৰোধ উঠাই লোৱাৰ লগতে মধ্যপ্রাচ্যৰ পৰা মার্কিন সেনা প্রত্যাহাৰ কৰিব লাগিব। আমেৰিকাই বৰ্তমানলৈকে ইৰানৰ দাবী সন্দৰ্ভত কোনো তাৎক্ষণিক প্রতিক্রিয়া প্রকাশ কৰা নাই।

উৎস: দৈনিক জনমভূমি