• পেগাছাছ কাণ্ড : সংসদত আলোচনাৰ দাবী ১৪ টাকৈ বিৰোধী দলৰ

    ৰাষ্ট্ৰীয়

    নতুন দিল্লী : পেগাছাছ চোৰাংচোৱাগিৰি কাণ্ডক লৈ দেশৰ ৰাজনীতিত এতিয়াও আলোড়ন অব্যাহত আছে। সংসদত এই বিষয় লৈ আজিও সংগবদ্ধভাৱে বিৰোধীয়ে আক্ৰমণ কৰে চৰকাৰক। ১৪টাকৈ বিৰোধী দলে পেগাছাছ সন্দৰ্ভত সংসদত আলোচনা কৰাৰ দাবী কৰে। এই সন্দৰ্ভত গৃহমন্ত্ৰীয়ে দিয়া এটা উত্তৰৰ আঁত ধৰি বিৰোধীয়ে চৰকাৰৰ বিৰুদ্ধে সৰৱ হৈ পৰে।

    চৰকাৰক ‘অহংকাৰী’ আৰু ‘জেদী’ আখ্যা দি বিৰোধীয়ে এখন পত্ৰযোগে চৰকাৰক সংসদীয় গণতন্ত্ৰক সন্মান কৰি আলোচনাৰ প্ৰস্তাৱ গ্ৰহণ কৰিবলৈ আহ্বান জনায়। চৰকাৰে সংসদত এই বিষয় লৈ আলোচনা অনুষ্ঠিত কৰাত বাধা প্ৰদান কৰি থকাটোক দুৰ্ভাগ্যজনক আখ্যা দিয়ে বিৰোধী জোঁটে।

    উল্লেখ্য যে, পেগাছাছ ছফ্টৱেৰৰ জৰিয়তে ভালেকেইগৰাকী বিৰোধী দলৰ নেতা, প্ৰশান্ত কিশোৰৰ দৰে নিৰ্বাচনী কৌশল নিৰ্ধাৰক তথা ভালেকেইগৰাকী সংবাদিককে ধৰি তিনি শতাধিক লোকৰ মোবাইলত অবৈধ নজৰদাৰি কৰাৰ তথ্য পোহৰলৈ অহাৰ পাছতে চৰকাৰৰ বিৰুদ্ধে আক্ৰমণাত্মক ভূমিকা গ্ৰহণ কৰি আহিছে বিৰোধী দলসমূহে। ইয়াৰ বিপৰীতে চৰকাৰে এই কথাক নস্যাৎ কৰি বিষয়টো আলোচনাৰ পৰা বিৰত আছে।

    Weather Forecast