বিয়াৰ দিনাই অঘটন! দৰা অহাৰ পাছতেই কইনাক গুলীয়াই হত্যা কৰিলে গাঁৱৰ যুৱকে

ডিজিটেল ডেস্কঃ এক সুখৰ মুহুৰ্ত হঠাতে পৰিণত হ'ল বিষাদত। এগৰাকী কইনাক বিয়াৰ দিনাই গুলীয়াই হত্যা কৰিলে এজন যুৱকে। উত্তৰ প্ৰদেশৰ (Uttar Pradesh) মথুৰাত সংঘটিত হৈছে এই কৰুণ ঘটনা। কোঠাটোত বহি থকা কইনা এগৰাকীক এজন যুৱকে গুলীয়াই হত্যা কৰাৰ পাছত বিবাহৰ আনন্দ শোকত পৰিণত হয়। এই জঘন্য অপৰাধ সংঘটিত কৰি অভিযুক্তজন ঘটনাস্থলীৰ পৰা লগালগ পলাই যায়। 

গুলীৰ আঘাতত কইনাগৰাকীৰ ঘটনাস্থলীতে মৃত্যু হয়। জানিব পৰা মতে একপক্ষীয় প্ৰেমত থকা এজন যুৱকে এই চাঞ্চল্যকৰ কাৰ্য সংঘটিত কৰিছে। বৰ্তমান আৰক্ষীয়ে এটা গোচৰ ৰুজু কৰিছে আৰু অভিযুক্তজনক বিচাৰিবলৈ আৰম্ভ কৰিছে। ঘটনাটো নৌহঝিল আৰক্ষী থানা অঞ্চলৰ অন্তৰ্গত মুবাৰকপুৰ গাঁৱত সংঘটিত হৈছিল। প্ৰাপ্ত বাতৰি অনুসৰি খুবিৰামৰ জীয়ৰী কাজলৰ বিয়া নয়ডাৰ এজন যুৱকৰ সৈতে ঠিক কৰা হৈছিল। বৃহস্পতিবাৰে এই বিয়া ধুমধামেৰে চলি আছিল। দৰাঘৰীয়া কইনাগৃহত আহি উপস্থিত হৈছিলহি। 

কইনাৰ পক্ষৰ মানুহে দৰাঘৰীয়াক বেচ আড়ম্বৰপূৰ্ণভাৱে আদৰণি জনাইছিল। ইয়াৰ পাছত বিবাহ আৰু বৰমালাৰ ৰীতি-নীতি সম্পন্ন কৰা হৈছিল। অলপ পাছত কইনাৰ বান্ধৱী আৰু ঘৰৰ মহিলাসকলে কইনাগৰাকীক তেওঁৰ কোঠালৈ লৈ গৈছিল। কোঠাটোত কইনা কাজলে মণ্ডপত সাত ফেৰে ল'বলৈ অপেক্ষা কৰি আছিল।  সেই সময়তে গাওঁখনৰ এজন ল'ৰা কোঠাটোত উপস্থিত হৈছিল। 

যুৱকজনে কইনা কাজলক গুলীয়াইছিল। গুলীটো কাজলৰ চকুত লাগিছিল, যাৰ ফলত তেওঁ আঘাতপ্ৰাপ্ত হৈ ঘটনাস্থলীতে মৃত্যুবৰণ কৰিছিল।কইনাগৰাকীৰ হত্যাই বিবাহ অনুষ্ঠানত আতংকৰ সৃষ্টি কৰিছিল। ইয়াৰ মাজতে অভিযুক্তজন পলাই যায়। তথ্য পোৱাৰ লগে লগে আৰক্ষী ঘটনাস্থলীত উপস্থিত হৈছিল। পৰিয়ালৰ সদস্যসকলে দিয়া অভিযোগৰ ভিত্তিত গোচৰ ৰুজু কৰি অপৰাধীৰ বিৰুদ্ধে ব্যৱস্থা গ্ৰহণ কৰা হৈছে। গোচৰটোৰ বৰ্তমান জোৰদাৰ তদন্ত চলি আছে।