যি হে চৰা দাম! বিয়াত দৰা-কইনাক পেট্ৰ'ল-ডিজেল উপহাৰ দিলে বন্ধুবৰ্গই

ডিজিটেল ডেস্কঃ দেশত প্ৰতিদিনে বৃদ্ধি পোৱা পেট্ৰ'ল আৰু ডিজেলৰ দামে বৰকৈ কন্দুৱাইছে সাধাৰণ ৰাইজক। একেবাৰতে দাম নবঢ়াই অলপ অলপকে বঢ়াই জনতাৰ মোৰত ৰামটাঙোন সোধাই আছে চৰকাৰে। এতিয়া সময় এনেকুৱা আহি পৰিছে যে পেট্ৰ'ল আৰু ডিজেল যেন কোনো মূল্যৱান সামগ্ৰীতকৈ কোনো গুণে কম নহয়। বৰ্তমানৰ পৰিস্থিতিত বিবাহৰ উপহাৰতো স্থান পালে পেট্ৰ'ল আৰু ডিজেলে! হয়, আমি আপোনাৰ সৈতে কোনো ধেমালি কৰা নাই। এয়া একেবাৰে সত্য কথা। 

দেশত পেট্ৰ'ল আৰু ডিজেলৰ মূল্য এনেকুৱা যে এতিয়া মানুহে তেওঁলোকৰ বন্ধুবৰ্গৰ বিয়াত ইয়াক উপহাৰ হিচাপে দিয়া আৰম্ভ কৰিছে। অশনি সংকেত হিচাপে দি আছে। শেহতীয়া ঘটনাটো তামিলনাডুৰ চেয়ুৰৰ। গ্ৰেছ কুমাৰ আৰু কীৰ্তনা নামৰ এহাল দৰা-কইনাৰ বন্ধুসকলে তেওঁলোকক বিবাহৰ উপহাৰ হিচাপে ১ লিটাৰ পেট্ৰ'ল আৰু ১ লিটাৰ ডিজেল দিয়ে। বন্ধুবৰ্গৰ এই অনন্য উপহাৰটো দেখি প্ৰথমে নৱবিবাহিত দম্পতী আচৰিত হৈছিল। পিছত দৰা-কইনাই আনন্দেৰে তেওঁলোকৰ বাবে বন্ধুবৰ্গই অনা মৰমৰ উপহাৰটি গ্ৰহণ কৰে।

দৰা-কইনাই পেট্ৰ'ল আৰু ডিজেল উপহাৰ লোৱাৰ সময়ত বন্ধুবৰ্গৰ সৈতে ফটোও উঠিছিল, যিটো এতিয়া ছ'চিয়েল মিডিয়াত ভাইৰেল হৈ আছে। উল্লেখ্য যে দেশত ২২ মাৰ্চৰ পৰা পেট্ৰ'ল আৰু ডিজেলৰ মূল্য নিৰন্তৰভাৱে বৃদ্ধি হৈ আহিছে। মূল্যবৃদ্ধিয়ে তামিলনাডুতো প্ৰভাৱ পেলাইছে। তামিলনাডুত এক লিটাৰ পেট্ৰ'লৰ দাম প্ৰতি লিটাৰত ১১০.৮৫ টকা আৰু ডিজেল প্ৰতি লিটাৰত ১০০.৯৪ টকা। মূল্যৰ এই বৃদ্ধিয়ে সাধাৰণ মানুহৰ পকেট দুখী কৰি তুলিছে।