ডিজিটেল ডেস্ক: লোকসভা নিৰ্বাচনৰ দিন যিমানেই চমু চাপিছে, সিমানেই সলনি হ’বলৈ ধৰিছে ৰাজ্যৰ ৰাজনৈতিক প্ৰেক্ষাপট৷ অচিৰেই ৰাজ্যৰ ৰাজনীতিত আহিব পাৰে বৰভূইকঁপ৷
লোকসভা নিৰ্বাচনৰ প্ৰাকমুহূৰ্তত ‘ইণ্ডিয়া’ মিত্ৰজোঁটৰ বাবে সুসংবাদ কঢ়িয়াই অগপ, গণশক্তি, বিপিএফৰ কেইবাগৰাকীও শীৰ্ষনেতাই যোগদান কৰিব কংগ্ৰেছত৷ এই খবৰে স্বাভাৱিকতে ৰাজ্যিক বিজেপিৰ ভিতৰচ’ৰাত সৃষ্টি কৰিছে তীব্ৰ ধুমুহাৰ৷
আঞ্চলিক ৰাজনীতিৰ লগত জড়িত বহুনেতাই কংগ্ৰেছত যোগদান কৰিব বুলি সদৰী কৰিছে স্বয়ং প্ৰদেশ কংগ্ৰেছৰ সভাপতি ভূপেন বৰাই৷ অক্টোবৰৰ প্ৰথম সপ্তাহতে শীৰ্ষ পৰ্যায়ৰ নেতাসকলে কংগ্ৰেছত যোগদান কৰিব বুলি বাতৰি প্ৰকাশ পাইছে৷
কিন্তু, কিয় এই অসন্তুষ্টি? শেহতীয়াকৈ দেখা গৈছে ৰাজ্যিক বিজেপিৰ ভিতৰে-বাহিৰে গঢ় লৈ উঠিছে বিদ্ৰোহ-বিসম্বাদ৷ দল আৰু চৰকাৰৰ সকলো ক্ষমতা কুক্ষিগত কৰিছে মুষ্টিমেয় কেইগৰাকীমান নেতা-মন্ত্ৰীয়ে৷
বিজেপিলৈ আগমন ঘটা প্ৰাক্তন কংগ্ৰেছী নেতাসকলৰ আগ্ৰাসী ৰাজনীতিয়ে সংকট নমাই আনিছে দলটোৰ জ্যেষ্ঠ তথা পুৰণি নেতাসকললৈ৷ আৰু তাৰ বাবেই বিজেপিত বিসম্বাদৰ ৰেহৰূপ দেখা গৈছে সৰ্বত্ৰ৷
অগপ, গণশক্তি ইত্যাদি মিত্ৰশক্তিকো বিজেপিৰ ৰাজনীতিয়ে অচল মুদ্ৰাত পৰিণত কৰি পেলাইছে৷ তেনেসময়ত একাংশ নেতা ৰাজনৈতিকভাবেই সংকটত পৰিছে৷ আৰু সেয়ে হয়তো কংগ্ৰেছত যোগদান কৰিবলৈ এনে একাংশ নেতাই৷ আৰু যদি এয়াই হয়, তেন্তে নিৰ্বাচনৰ প্ৰাকমুহূৰ্তত বিজেপিৰ বাবে এয়া হ’ব বৃহৎ ক্ষতি৷
Leave A Comment