বৰপেটাৰ এখন মীন সমবায় সমিতিত; বৃহৎ পৰিমাণৰ ধন আত্মসাৎ কৰাৰ অভিযোগ সম্পাদকৰ বিৰুদ্ধে...

প্ৰাপ্ত খবৰ অনুসৰি  বৰপেটা জিলাৰ বাটগাওঁ নয়াপাৰা মীন সমবায় সমিতিত প্ৰায় পয়ত্ৰিশ বছৰে একনায়কত্ব বাদ চলাই আহিছে সমবায় খনৰ সম্পাদক জয়দেব দাসে। পয়ত্ৰিশ বছৰে নাই সমবায় খনৰ কাৰ্যালয়, সম্পাদকৰ ঘৰৰ পৰাই চলাই গৈছে কাৰ্যালয়ৰ কাম কাজ।

অভিযোগ অনুসৰি কোনো ধৰণৰ সাধাৰণ সভা অনুষ্ঠিত নকৰাকৈ মীন বিভাগৰ বৰপেটা কাৰ্যালয়ৰ বিষয়া কৰ্মচাৰীক মেনেজ কৰি সদস্য সকলৰ ভুৱা চহীৰে কাগজে পত্ৰই সাধাৰণ সভা অনুষ্ঠিত হোৱা দেখুৱাই বৃহৎ পৰিমাণৰ ধন আত্মসাৎ কৰাৰ অভিযোগ উত্থাপন কৰিছে সদস্য সকলে। ইয়াৰোপৰি পয়ত্ৰিশ বছৰে সমবায় খনৰ হিচাব দেখোৱা নাই সম্পাদক জয়দেব দাসে।সদস্য সকলৰ অনুপস্থিতিত নিজৰ ঘৰত সমবায়ৰ বছৰি হিচাব মিলাই দাখিল কৰে মীন বিভাগৰ কাৰ্য্যালয়ত। সমবায়ৰ সিতানৰ নামত অহা বছৰি প্ৰায় দুই তিনি লাখ টকাৰ ৰাজসাহায্য আজি অত বছৰে সম্পাদকে নিজৰ জেপত সোমাই ৰখাৰ অভিযোগ সদস্য সকলৰ।

এই ক্ষেত্ৰত তেওঁক সহায় কৰি আহিছে মীন বিভাগৰ বৰপেটা কাৰ্যালয়ৰ একাংশ বিষয়া আৰু কৰ্মচাৰীয়ে। আজি অত বছৰে মৃত ব্যক্তিৰ নাম সংযোজন কৰি ভুৱা চহীৰে তালিকা প্ৰস্তুত কৰি সমবায় খনৰ সদস্যৰ নামৰ তালিকা প্ৰস্তুত কৰি আহিছে বুলি নিশ্চিত হৈ পৰিছে সমবায় খনৰ সদস্য সকল এই সমগ্ৰ তথ্য তথ্য জনাৰ অধিকাৰ আইনৰ জৰিয়তে তেওঁলোকে গম পোৱা বুলি উল্লেখ কৰিছে।

অসম চৰকাৰে মীন বিভাগৰ জৰিয়তে মীন সমবায় সমুহক বিভিন্ন সুবিধা প্ৰদান কৰি আহিছে। কিন্তু এই সুবিধা সমুহ সমবায় সমুহৰ একাংশ সম্পাদকে নিজে হজম কৰি সমবায় নামত ধন ঘটাৰ আহিলা গঢ়ি তুলিছে। বাট গাওঁ নয়াপাৰা মীন সমবায় খনৰ  সম্পাদকৰ পদত থকা বিষয়া গৰাকী তাৰ এক জলন্ত উদাহৰণ। ইয়াক লৈ ক্ষোভিত হৈ পৰিছে অঞ্চলটোৰ ৰাইজৰ লগতে সমবায় খনৰ সদস্য সকল।

এই সমগ্ৰ ঘটনাৰ উচিত তদন্ত বিচাৰি আজি বৰপেটা জিলা মীন বিভাগৰ কাৰ্য্যালয়ত সমবেত হয় সমবায় খনৰ সদস্য সকলে। সদস্য সকলে সংবাদ মাধ্যমৰ আগত জনোৱা মতে এই বিষয়ে বহু বাৰ মীন বিভাগৰ বৰপেটা কাৰ্যালয়ৰ বিষয়াক অৱগত কৰা হৈছিল যদিও আজি পৰ্যন্ত একো সদুত্তৰ পোৱা নাই।উপায়ন্তৰ হৈ অবশেষত অসমৰ মুখ্যমন্ত্ৰী হিমন্ত বিশ্ব শৰ্মাৰ হস্তক্ষেপ বিচাৰিছে সমবায় খনৰ সদস্য সকলে। অন্যথা এই ক্ষেত্ৰত তীব্ৰ আন্দোলন গঢ়ি তোলাৰো সকিয়নি প্ৰদান কৰিছে বাট গাওঁ নয়াপাৰা মীন সমবায় সমিতিৰ সদস্য সকলৰ ফালৰপৰা।