আজি ৩ এপ্ৰিলঃ আজিৰ দিনটোতে আৱিষ্কাৰ হৈছিল মোবাইল ফোন, বিশ্ববাসীক কি আহ্বান জনাইছে মোবাইল ফোনৰ আৱিষ্কাৰকে?

 ১৯৭৩ চনৰ ৩ এপ্ৰিলত আৱিষ্কাৰ হোৱা মোবাইল ফোনটো এতিয়া প্ৰায় সকলোৰে বাবে জীৱনৰ এক এৰাব নোৱাৰা অংগ হৈ পৰিছে৷ দিনটোৰ প্ৰায় ভাগ সময়েই আমাৰ মাজৰে বহুতে মোবাইল ফোনটো পিটিকি থাকিয়েই পাৰ কৰি দিয়ে৷ কিন্তু মোবাইল ফোনৰ ব্যৱহাৰ যিমান পাৰি এৰাই চলিবলৈ পৰামৰ্শ দিছে খোদ ম'বাইল ফোনৰ সৃষ্টিকৰ্তা মাৰ্টিন কুপাৰে৷  

বিবিচিক দিয়া   এক সাক্ষাৎকাৰত ৯৩ বছৰীয়া মাৰ্টিনে এইদৰে কয়: "মই দিনত ৫ শতাংশতকৈও কম সময়ত মোৰ মোবাইল ফোনটো ব্যৱহাৰ কৰোঁ। ''

প্ৰথম 'ৱায়াৰলেচ ফোন' উদ্ভাৱন কৰি, তেওঁ সমগ্ৰ বিশ্বতে মোবাইল ফোনৰ বাবে এটা মসৃণ বাট কাটি দিছিল। যোৱা শতিকাৰ ১৯৭০ ৰ দশকত মোবাইল ফোন 'মটৰোলা ডাইনাটক ৮০০০এক্স'ৰ জৰিয়তে আৰম্ভ হোৱা যাত্ৰাই আজি পৃথিৱীখন সলনি কৰি দিছে।  মোবাইল ফোনৰেই অন্যতম সৃষ্টিকৰ্তা মাৰ্টিন কুপাৰেই দিনটোৰ ৫ শতাংশতকৈ কম সময় স্মাৰ্টফোন ব্যৱহাৰ কৰাৰ কথাটো নিঃসন্দেহে মন কৰিবলগীয়া কথা৷

মোবাইল ফোনৰ ব্যৱহাৰৰ প্ৰসংগত মাৰ্টিনে  কয়, "জীৱন উপভোগ কৰিবলৈ আপুনি মোবাইল ফোনৰ ব্যৱহাৰ হ্ৰাস কৰিবই লাগিব। ''

যিসকলে দিনৰ পাঁচ শতাংশতকৈ অধিক সময়  মোবাইল ফোনৰ সৈতে অতিবাহিত কৰে তেওঁলোকৰ বাবে কি ক’ব বুলি সাংবাদিকে সোধাত মাৰ্টিনে হাঁহি এটা মাৰি মাথো, "জীৱন উপভোগ কৰিবলৈ শিকক। মোবাইল ফোনৰ ব্যৱহাৰ হ্ৰাস কৰক। ''

মোবাইল ফোনৰ আৱিষ্কাৰকে ফোনৰ পৰা যিমান পাৰি দূৰৈত থাকিবলৈ দিয়া পৰামৰ্শৰ আঁৰত হয়তো বহু কথাই লুকাই আছে৷ ফোনটোৰ সৈতে বেছি সময় জৰিত হৈ থাকিলে স্বাস্থ্যৰ ক্ষতিৰ লগতে সময়তো নষ্ট হ’ব পাৰে৷

তদুপৰি মোবাইল ফোনৰ প্ৰচলন বৃদ্ধিৰ লগে লগে মানুহৰ মাজৰ আত্মীয়তাও এতিয়া বহু পৰিমাণে কৃত্ৰিম হৈ পৰিছে৷ এতিয়া বিপদ অথবা সম্পদৰ সময়তো বহু মানুহৰ বাবে মাত এষাৰ দিবলৈও সময় নোহোৱাৰ দৰে হৈ পৰিছে৷ 

এক কথাত সকলো সম্পৰ্কই এতিয়া যেন যান্ত্ৰিক হৈ পৰাৰ উপক্ৰম ঘটিছে৷ মাৰ্টিনে হয়তো তেওঁৰ মন্তব্যৰ জৰিয়তে তেনে কথাৰেই ইংগিত দিব বিচাৰিছিল৷