লেণ্ডাৰ ইমেজাৰ কেমেৰাৰ পৰা দেখা চন্দ্ৰৰ ভিডিঅ’ মুকলি কৰিলে ইছৰ’ৱে; সৰ্বত্ৰ চৰ্চা

ভিডিঅ’টোত চন্দ্ৰৰ পৃষ্ঠভাগ অতি উজ্জ্বল হোৱা দেখা গৈছে, য’ত বহু ঠাইত ক্ৰেটাৰো দেখা গৈছে। ইছৰ’ৰ তথ্য অনুসৰি এই ছবিসমূহ দেওবাৰে (২০ আগষ্ট, ২০২৩) তোলা হৈছে।উল্লেখ্য যে চন্দ্ৰযান-৩য়ে চন্দ্ৰৰ দক্ষিণ মেৰুত অৱতৰণ কৰিব। এয়া ভাৰতৰ তৃতীয় চন্দ্ৰ অভিযান, যাৰ ওপৰত সমগ্ৰ বিশ্বৰ চকু কেন্দ্ৰীভূত হৈ আছে কাৰণ ইয়াৰ পূৰ্বে ২০ আগষ্ট দেওবাৰে ৰাছিয়াৰ চন্দ্ৰ অভিযান ‘লুনা-২৫’ দুৰ্ঘটনাৰ বাবে বিফল হৈছিল। সেইখন যানৰো উদ্দেশ্য দক্ষিণ মেৰুত অৱতৰণেই আছিল। চন্দ্ৰৰ এই অংশত এতিয়ালৈকে কোনো দেশ উপস্থিত হ’ব পৰা নাই। যদি চন্দ্ৰযান-৩ৰ সুস্থিৰ অৱতৰণ সফল হয়, তেন্তে দক্ষিণ মেৰুত অৱতৰণৰ ক্ষেত্ৰত এই কৃতিত্ব অৰ্জন কৰা ভাৰত প্ৰথমখন দেশ হিচাপে পৰিগণিত হ’ব।

ইছৰ’ৰ মুৰব্বী এছ সোমনাথে কয় যে বৰ্তমান সকলো কাম সঠিকভাৱে চলি আছে। নিৰ্ধাৰিত সময়ত চন্দ্ৰযান-৩ৰ অৱতৰণক লৈ তেওঁ আশাবাদী। টি অ’ আইৰ সৈতে হোৱা বাৰ্তালাপত ইছৰ’ৰ মুৰব্বী সোমনাথে কয় যে চন্দ্ৰযান-৩ৰ এই যাত্ৰাত এতিয়ালৈকে একো হোৱা বিঘিনি হোৱা নাই আৰু হোৱাৰ সম্ভাৱনাও ক্ষীণ।লগতে তেওঁ কয় যে এতিয়ালৈকে যানখনৰ সকলো ব্যৱস্থাই ইছৰ’ৰ প্ৰয়োজনীয়তা অনুসৰি কাম কৰিছে তথা তেওঁলোক সকলো যানখনৰ অৱতৰণক লৈ আশাবাদী৷