প্ৰতি বছৰে ২ মি.মি বৃদ্ধি মাউণ্ট এভাৰেষ্টৰ উচ্চতা ; অধ্যয়নত প্ৰকাশ বিস্ফোৰক তথ্য

অধ্যয়নৰ সহ-লেখক এডাম স্মিথে এক সাক্ষাৎকাৰত কয় যে, ‘এয়া জাহাজৰ পৰা সামগ্ৰী পেলোৱাৰ দৰেই। জাহাজখন পাতল হৈ পৰাৰ বাবে যেনেকৈ পানীৰ আৰু অলপ ওপৰলৈ ভাঁহি আহে। বিজ্ঞানীসকলে কয় যে ৪ৰ পৰা ৫ কোটি বছৰ পূৰ্বে ভাৰতীয় আৰু ইউৰেছিয়ান প্লেটৰ সংঘৰ্ষৰ বাবে সৃষ্টি হোৱা চাপৰ ফলত হিমালয়ৰ সৃষ্টি হৈছে। প্লেট টেকটনিকৰ বাবে হিমালয়ৰ উচ্চতা ক্ৰমাগতভাৱে বৃদ্ধি পাইছে।

ইউচিএলএৰ গৱেষকসকলে কয় যে অৰুণ নদীৰ মেৰপাকে পাহাৰটোৰ বৃদ্ধিত সহায় কৰিছে। গৱেষকসকলে ব্যাখ্যা কৰে যে অৰুণ নদীখনে হিমালয়ৰ মাজেৰে বৈ যোৱাৰ লগে লগে পৃথিৱীৰ খোলাৰ পৰা পদাৰ্থবোৰ (নদীৰ তল) কাটি পেলায়। ইয়াৰ ফলত খোলাৰ তলৰ পৰৱৰ্তী স্তৰৰ ওপৰত চাপ কমি যায়, যাৰ ফলত খোলাটো নমনীয় হৈ ওপৰলৈ ওপঙি যায়। ইয়াক আইছ’ষ্টেটিক ৰিবাউণ্ড বোলা হয়।

এক গৱেষণাত কোৱা হৈছে যে এই উৰ্ধমুখী শক্তিয়ে এভাৰেষ্ট আৰু বিশ্বৰ চতুৰ্থ আৰু পঞ্চম সৰ্বোচ্চ শৃংগ লোট্চে আৰু মাকালুকে ধৰি অন্যান্য চুবুৰীয়া শৃংগবোৰক ওপৰলৈ ঠেলি দিছে। বিবিচিয়ে নিজৰ প্ৰতিবেদনত অধ্যয়নৰ সহ-লেখক ড০ মেথিউ ফক্সৰ উদ্ধৃতি দি কয় যে মাউণ্ট এভাৰেষ্ট আৰু ইয়াৰ ওচৰৰ শৃংগসমূহ বৃদ্ধি পাইছে কাৰণ আইছ’ষ্টেটিক ৰিবাউণ্ডে কম কৰাতকৈ বেছি দ্ৰুতগতিত ওপৰলৈ তুলিছে।

তেওঁ আগলৈ কয়, ‘জিপিএছৰ সহায়ত আমি এভাৰেষ্টৰ বছৰি প্ৰায় দুই মিলিমিটাৰ উচ্চতা বৃদ্ধি হোৱা দেখিবলৈ পাওঁ আৰু এতিয়া আমি কিয় এনেকুৱা হৈছে সেই বিষয়ে ভালদৰে বুজি পাইছো। এই অধ্যয়নৰ সৈতে জড়িত নোহোৱা কিছুমান ভূতত্ত্ববিদে কয় যে এই তত্ত্ব বিশ্বাসযোগ্য কিন্তু গৱেষণাত এতিয়াও বহু কথা অনিশ্চিত হৈ আছে।’