এইবাৰ প্ৰশিক্ষক ৰূপত ব্ৰায়ান লাৰা: আই পি এল ফ্ৰেঞ্চাইজি ছানৰাইজাৰ্ছ হায়দৰাবাদৰ মুখ্য প্ৰশিক্ষক পদত নিযুক্ত লাৰা

দেওবাৰে আই পি এল ফ্ৰেঞ্চাইজি ছানৰাইজাৰ্ছ হায়দৰাবাদে দলৰ নতুন মুখ্য প্ৰশিক্ষক হিচাপে লাৰাক নিযুক্তি দিয়ে। ছানৰাইজাৰ্ছ হায়দৰাবাদে এক বিবৃতিত চলিত বৰ্ষৰ আৰম্ভণিৰ ফালে অনুষ্ঠিত হোৱা আই পি এলৰ ১৫ তম সংস্কৰণত দলটোৰ মুখ্য প্ৰশিক্ষক হিচাপে থকা টম মুডীৰ স্থানত লাৰাক নতুন মুখ্য প্ৰশিক্ষক পদত হিচাপে নিযুক্তি দিয়াৰ কথা সদৰী কৰে।

অৱশ্যে মুখ্য প্ৰশিক্ষক হিচাপে পূৰ্বে দায়িত্ব নল’লেও লাৰাই বিগত ছিজনত সহকাৰী প্ৰশিক্ষক হিচাপে দায়িত্ব পালন কৰিছিল। ছানৰাইজাৰ্ছ হায়দৰাবাদৰ সৈতে পৰামৰ্শদাতা আৰু বেটিং প্ৰশিক্ষক হিচাপে মুডীক সহযোগিতা আগবঢ়াইছিল লাৰাই। আগন্তুক ছিজনত কিংবদন্তী তাৰকাগৰাকীয়ে প্ৰথমবাৰৰ বাবে মুখ্য প্ৰশিক্ষকৰ দায়িত্ব বহন কৰিব।

স্মৰ্তব্য যে ২০১৩ চনৰ পৰা ২০১৯ চনৰ ভিতৰত প্ৰশিক্ষক হিচাপে টম মুডীৰ কাৰ্যকালতে ছানৰাইজাৰ্ছে পাঁচবাৰ প্লে অফত উপনীত হোৱাৰ বিপৰীতে ২০১৬ চনত চেম্পিয়ন হৈছিল। বিগত ছিজনতো মুডী দলটোৰ প্ৰশিক্ষক হিচাপে আছিল যদিও ছানৰাইজাৰ্ছে ছয়খন মেচত জয় আৰু আঠখনত পৰাজয়েৰে অষ্টম স্থানতে সন্তুষ্ট থাকিবলগীয়া হৈছিল।