ফ্ৰান্সৰ নিৰ্বাচনঃ ইউৰোৰ ব্যস্ততাৰ মাজতে দেশৰ ঐক্য-সংহতিৰ বাবে বিশেষ বাৰ্তা দিলে কিলিয়ান এমবাপেই

এমবাপে কয় যে তেওঁ চৰম বিভাজনকাৰী ধাৰণাৰ বিৰোধী। দেশখনৰ নিৰ্বাচনৰ পূৰ্বে তেওঁ পুনৰবাৰ ফ্ৰান্সৰ ঐক্য আৰু সংহতিৰ ওপৰত গুৰুত্ব আৰোপ কৰিবলৈ আহ্বান জনায়। এমবাপেই দেশবাসীক চিন্তা কৰিবলৈ আৰু ভোট দিবলৈ কয়। যদিও ৰাজনীতিৰ লগত জড়িত নহয়, তথাপিও তেওঁৰ সামাজিক চিন্তাধাৰাৰ কিছুমান ৰাজনৈতিক প্ৰভাৱ থকা বুলি ধৰা হয়।

ফ্ৰান্সৰ অধিনায়ক এমবাপে কয়, ‘মই ভাবো এইটো এটা অতি গুৰুত্বপূৰ্ণ সময়। আমাৰ দেশৰ ইতিহাসৰ বাবে অতি গুৰুত্বপূৰ্ণ। এক অভূতপূৰ্ব পৰিস্থিতি। আমাৰ ফুটবল জীৱনত ইউৰো অতি গুৰুত্বপূৰ্ণ। কিন্তু আমি প্ৰথমে দেশৰ নাগৰিক। সেইটোৱেই আটাইতকৈ গুৰুত্বপূৰ্ণ কথা। এনে লাগে যেন আমি পৃথিৱীৰ বাকীবোৰৰ লগত সংযোগ বিচ্ছিন্ন হ’লে ভাল নহ’লহেঁতেন৷ আমি দেখাৰ দৰে চৰমপন্থীসকল ক্ষমতা অৰ্জনৰ খুব ওচৰ চাপিছে। কিন্তু আমাৰ দেশৰ ভৱিষ্যত বাছি লোৱাৰ অধিকাৰ আমাৰ আছে।’’

লগতে তেওঁ কয় - ‘‘দেশৰ সকলো যুৱক-যুৱতী ওলাই গৈ ভোটদান কৰিবলৈ আহ্বান জনাব বিচাৰিছো। বৰ্তমান পৰিস্থিতিৰ গুৰুত্ব বুজিবলৈ চেষ্টা কৰক। আমাৰ দেশে বৈচিত্ৰ্য আৰু সহনশীলতাৰ মূল্যৰ ওপৰত গুৰুত্ব দিয়া উচিত। আশাকৰোঁ, আমি সঠিক সিদ্ধান্ত লম।”

সোমবাৰে ইউৰো কাপত ফ্ৰান্সৰ প্ৰথমখন খেল। এমবাপেৰ দলৰ প্ৰথম প্ৰতিদ্বন্দ্বী অষ্ট্ৰিয়া। সেই মেচৰ পূৰ্বে অধিনায়কগৰাকীৰ এই বক্তব্যত বহুতে ফ্ৰান্সৰ নিৰ্বাচনী ৰাজনীতিৰ স্পৰ্শ দেখিবলৈ পাইছে। অৱশ্যে কোনো বিশেষ দলক ভোট দিয়াৰ কথা তেওঁ উল্লেখ কৰা নাই। তেওঁ দেশবাসীক সম্ভাৱ্য পৰিস্থিতিৰ বিষয়ে অৱগত কৰি সিদ্ধান্ত ল’বলৈ আহ্বান জনায়।