টি২০ বিশ্বকাপৰ মাজতে অঘটন! চুইমিং পুলত মৃত্যু হ’ল ইৰফান পাঠানৰ মেকআপ আৰ্টিষ্টৰ

ইৰফানে ব্যক্তিগত মেক-আপ আৰ্টিষ্ট ফায়াজৰ সৈতে ৱেষ্ট ইণ্ডিজলৈ গৈছিল। প্ৰাক্তন অলৰাউণ্ডাৰগৰাকীয়ে সাধাৰণতে বিদেশ ভ্ৰমণলৈ লগত লৈ গৈছিল ফায়াজক। শুকুৰবাৰে সন্ধিয়া হোটেলখনৰ চুইমিং পুলত সাঁতুৰিবলৈ গৈছিল ফায়াজে। তেতিয়া তেওঁৰ মৃত্যু হয়। তেওঁৰ মৃত্যুৰ সঠিক কাৰণ জানিব পৰা হোৱা নাই। ইৰফানে ৱেষ্ট ইণ্ডিজৰ পৰা ফায়াজৰ মৃতদেহ ভাৰতলৈ ঘূৰাই অনাৰ ব্যৱস্থা কৰিছে।

ফয়াজৰ ভায়েক মহম্মদ আহমেদে ক'লে, "ফয়াজ কেইদিনমান আগতে বিজনোৰৰ ঘৰলৈ আহিছিল। মাত্ৰ দুমাহ আগতে তেওঁৰ বিয়া হৈছিল। মুম্বাইলৈ উভতি অহাৰ পিছত তেওঁ আমেৰিকালৈ আৰু পিছলৈ ৱেষ্ট ইণ্ডিজলৈ যায়। আমি বেছি কথা ক’ব পৰা অৱস্থাত নাই। পৰিয়ালটোৰ বাবে এটা ডাঙৰ জোকাৰণি। ইৰফান ভাইয়ে তাত সকলো চাই আছে। তেওঁ আমাৰ সৈতে যোগাযোগত আছে।’’

ইৰফানে ফায়াজৰ মৃতদেহ দিল্লীলৈ পঠোৱাৰ ব্যৱস্থা কৰিছে। ইয়াৰ বাবে তিনি-চাৰিদিন সময় লাগিব বুলি আশা কৰা হৈছে। মূলতঃ বিজনুৰৰ ফায়াজৰ মুম্বাইত নিজাকৈ চেলুন আছে। তাতে পাঠানৰ লগত কথা-বতৰা পাতিলে। পিছলৈ দুয়োৰে মাজত বন্ধুত্ব গঢ় লৈ উঠিছিল। পিছলৈ ইৰফানে ফায়াজক নিজৰ ব্যক্তিগত মেক-আপ আৰ্টিষ্ট হিচাপে গঢ়ি তুলিছিল।