জয়ৰ ট্ৰেকলৈ ঘূৰিল বীজেন্দ্ৰ: প্ৰ’ বক্সিং ৰিঙত প্ৰত্যাৱৰ্তন যুঁজতে প্ৰতিপক্ষক নক আউট

উল্লেখ্য যে কেৰিয়াৰৰ প্ৰথম বাৰখন প্ৰ’ বক্সিং যুঁজত ধাৰাবাহিক জয়ৰ পিছত যোৱা বৰ্ষত প্ৰথমটো পৰাজয়ৰ সন্মুখীন হৈছিল বীজেন্দ্ৰ। ৰাছিয়ান বক্সাৰ আৰ্টিশ লোপচানে বিগত বৰ্ষৰ ১৯ মাৰ্চত গোৱাত ভাৰতীয় তাৰকা বক্সাৰগৰাকীক পৰাস্ত কৰিছিল। তাৰ পিছৰে পৰা প্ৰ’ বক্সিং ৰিঙত আনুষ্ঠানিকভাৱে অৱতীৰ্ণ হোৱা নাছিল বীজেন্দ্ৰ।

বীজেন্দ্ৰ সিঙে আজি দ্বিতীয় ৰাউণ্ডৰ আৰম্ভণিতেই পশ্চিম আফ্ৰিকা বক্সিং ইউনিয়ন চেম্পিয়ন এলিয়াচু চুলিক নক আউট কৰে। ইলিয়াচু চুলিৰ ক্ৰমাগত ৮ খন মেচৰ জয়ৰ ধাৰা ভংগ কৰি বীজেন্দ্ৰই প্ৰ’ বক্সিং কেৰিয়াৰ ৰেকৰ্ড ১৩-১ লৈ বৃদ্ধি কৰে। 

জয়ৰ পিছতে সুখ প্ৰকাশ কৰি বীজেন্দ্ৰই কয় যে দুবছৰৰ পিছত জয়ৰ ট্ৰকলৈ ঘূৰি তেওঁ আনন্দিত। বিজয়েৰে এক নতুন ছিজন আৰম্ভ কৰাটো সদায়ে সুখকৰ বুলি মন্তব্য কৰি তেওঁৰ প্ৰশিক্ষকৰ দলটোৰ প্ৰতিও কৃতজ্ঞতা প্ৰকাশ কৰে।

লোপচানৰ বিৰুদ্ধে হোৱা পৰাজয়ৰ পিছৰে পৰা বীজেন্দ্ৰ মানচেষ্টাৰত প্ৰশিক্ষণত ব্যস্ত আছিল। আজিৰ জয়ৰ পিছতে বক্সিং তাৰকাগৰাকীয়ে চলিত বৰ্ষৰ ডিচেম্বৰ বা অহা বৰ্ষৰ জানুৱাৰী মাহত পুনৰ বক্সিং ৰিঙত  অৱতীৰ্ণ হোৱাৰ ইঙ্গিত দিয়ে।