‘কিং ইজ বেক’! অৱসান ঘটিল শতকৰ খৰাং, ৰান মেচিনৰ বেটলৈ আহিল ৭১ তম শতক

উল্লেখ্য যে ২০১৯ চনৰ ২২ নৱেম্বৰত কলকাতাৰ ইডেন গাৰ্ডেনত বাংলাদেশৰ বিৰুদ্ধে টেষ্ট শৃংখলাৰ দ্বিতীয়খন টেষ্টত কোহলীয়ে সংগ্ৰহ কৰিছিল অন্তিমটো শতক। সেয়া আছিল কোহলীৰ কেৰিয়াৰৰ ৭০ সংখ্যক আন্ত:ৰাষ্ট্ৰীয় শতক।  তাৰ পাছৰ পৰাই কোহলী বেটৰ পৰা আন এটা আন্ত:ৰাষ্ট্ৰীয় শতক উপহাৰৰ বাবে প্ৰায় তিনিটা বছৰ  অপেক্ষা কৰিবলগা হ’ল ক্ৰিকেটপ্ৰেমীসকলে। 

আজি নিয়মীয়া অপেনাৰ তথা দলৰ অধিনায়ক ৰোহিত শৰ্মাৰ অনুপস্থিতিত দলৰ ইনিংছ মুকলি কৰা কোহলীয়ে আৰম্ভণিৰ পৰাই দমনীয় প্ৰদৰ্শন দাঙি ধৰে। আফগান বলিং শক্তিক নিৰ্দয় প্ৰহাৰেৰে থৰকাছুটি হেৰুৱাই পেলোৱা কোহলীয়ে আন্ত:ৰাষ্ট্ৰীয় টি-২০ কেৰিয়াৰত প্ৰথমটো শতক অৰ্জন কৰে। মাত্ৰ ৬১ টা বলত ১২ টা চাৰি আৰু ৬ টা ছয়েৰে ১২২ ৰানৰ এক বিস্ফোৰক ইনিংছ খেলি অপৰাজিত হয় তাৰকাগৰাকী। 

এই  শতকৰ সৈতে নিজৰ আন্ত:ৰাষ্ট্ৰীয় কেৰিয়াৰত ৭১ সংখ্যক শতক সম্পূৰ্ণ কৰি কোহলীয়ে ক্ৰিকেট ইতিহাসত সৰ্বাধিক শতক অৰ্জনকাৰী খেলুৱৈ হিচাপে ৰিকী পণ্টিঙক স্পৰ্শ কৰে আৰু ক্ৰিকেটৰ ভগৱান খ্যাত শচীন তেণ্ডুলকাৰৰ পিছতেই তালিকাত দ্বিতীয় স্থান লাভ কৰে। লগতে ইনিংছটোৰে টি-২০ কেৰিয়াৰত ৩,৫০০ ৰানো সম্পূৰ্ণ কৰে কোহলীয়ে। কোহলীৰ পূৰ্বে দলীয় সতীৰ্থ ৰোহিত শৰ্মাই শেহতীয়াকৈ চলিত এছিয়া কাপতে এই কৃতিত্ব অৰ্জন কৰিছিল।

উল্লেখ্য যে কোহলীৰ এই দুৰ্দান্ত ইনিংছৰ লগতে ভাৰপ্ৰাপ্ত অধিনায়ক ৰাহুলৰ ৬২ ৰানৰ সহায়ত ২১২ ৰানৰ বিশাল স্ক’ৰ থিয় কৰায়। আনহাতে ২১৩ ৰানৰ লক্ষ্য অনুসৰণ কৰি আফগানিস্তানে ভাৰতীয় পেচাৰৰ ভুৱনেশ্বৰ কুমাৰৰ ঘাতক বলিঙৰ সমুখত তিষ্ঠিব নোৱাৰি মাত্ৰ ১১১ ৰানহে সংগ্ৰহ কৰিবলৈ সক্ষম হয়। ভুৱনেশ্বৰে চাৰি অভাৰৰ স্পেলত এক অভাৰ মেইডেন দি মাত্ৰ চাৰি ৰান খৰচ কৰি পাঁচটা উইকেট দখল কৰে। 

আনহাতে আফগানিস্তানৰ হৈ ইব্ৰাহিম জৰ্দানে অকলেই যুঁজ কৰি ৬৪ ৰানত অপৰাজিত থাকে। অৱশ্যে জয়ী হ’লেও ভাৰতে ইতিপূৰ্বেই এছিয়া কাপৰ পৰা বিদায়ৰ মুখ দেখিছিল। সেয়েহে আজিৰ মেচত জয় ভাৰতৰ বাবে কেৱল সান্তনাৰ জয় হিচাপেহে বিবেচিত হৈছে। তৎসত্বেও মেচখনত কোহলী নিজৰ স্বভাৱসিদ্ধ ফৰ্মলৈ উভটি অহাটো ভাৰতৰ বাবে বিশেষ গুৰুত্বপূৰ্ণ। কিয়নো অহা মাহৰ পৰা অষ্ট্ৰেলিয়াত টি-২০ বিশ্বকাপ অনুষ্ঠিত হ’ব আৰু দলৰ মূল বেটিং ভৰসা কোহলীৰ ফৰ্মে ভাৰতৰ শক্তি এতিয়া বৃদ্ধি কৰিব।