পুনেৰ বন্ধ হৈ থকা জল পৰিশোধন প্ৰকল্পত ক্ল’ৰিন গেছ নিৰ্গমন; ২৪ গৰাকী লোকক চিকিৎসালয়ত ভৰ্তি

ডিজিটেল ডেস্কঃ মহাৰাষ্ট্ৰৰ পুনে চহৰৰ এটা ব্যৱহৃত নোহোৱা জল পৰিশোধন প্ৰকল্পত সংঘটিত এক ভয়ংকৰ গেছ নিৰ্গমনৰ ঘটনাই অঞ্চলটোত তীব্ৰ আতংকৰ সৃষ্টি কৰিছে। 

ক্ল’ৰিন গেছ নিৰ্গত হোৱাৰ ফলত প্ৰকল্পটোৰ ওচৰত বসবাস কৰা কমেও ২৪ জন লোক অসুস্থ হৈ পৰে, যাৰ বাবে তেওঁলোকক ততাতৈয়াকৈ চিকিৎসালয়ত ভৰ্তি কৰিবলগীয়া হয়।

পুনে পৌৰ নিগমৰ অধীনস্থ কাটাৰাজ অঞ্চলত থকা এই পুৰণি জল পৰিশোধন প্ৰকল্পটো দীৰ্ঘদিন ধৰি বন্ধ হৈ আছিল। আৰক্ষীৰ সূত্ৰৰ মতে, বৃহস্পতিবাৰে পুৱা প্ৰকল্পটোত মজুত থকা এটা চিলিণ্ডাৰৰ পৰা হঠাতে ক্ল’ৰিন গেছ নিৰ্গত হ’বলৈ আৰম্ভ কৰে। গেছৰ তীব্ৰ গোন্ধ সমগ্ৰ অঞ্চলটোত বিয়পি পৰাৰ লগে লগে স্থানীয় লোকৰ মাজত হাহাকাৰ লাগে।

অসুস্থ হৈ পৰা ২৪ জন লোকক ওচৰৰে এখন চৰকাৰী চিকিৎসালয়ত ভৰ্তি কৰা হয়। চিকিৎসকৰ মতে, বৰ্তমান সকলোৰে অৱস্থা সুস্থিৰ যদিও তেওঁলোকক নিবিড় পৰ্যবেক্ষণত ৰখা হৈছে।

ঘটনাৰ খবৰ পোৱাৰ লগে লগে অগ্নি নিৰ্বাপক বাহিনীৰ কেইবাখনো গাড়ী আৰু দুৰ্যোগ প্ৰশমন বাহিনী ঘটনাস্থলীত উপস্থিত হয়। উদ্ধাৰকাৰী দলে ক্ষিপ্ৰতাৰে গেছ নিৰ্গমন হোৱা চিলিণ্ডাৰটো চিনাক্ত কৰে আৰু পানী ছটিয়াই গেছৰ ঘনত্ব হ্ৰাস কৰাৰ চেষ্টা কৰে। প্ৰায় ২-৩ ঘণ্টাৰ প্ৰচেষ্টাৰ অন্তত পৰিস্থিতি নিয়ন্ত্ৰণলৈ আহে।

পুনে পৌৰ নিগমৰ এজন জ্যেষ্ঠ বিষয়াই সংবাদ মাধ্যমক জনোৱা মতে, "প্ৰকল্পটো বহু বছৰ ধৰি বন্ধ হৈ আছিল। তাত মজুত থকা পুৰণি চিলিণ্ডাৰ কেনেকৈ লিক হ’বলৈ পালে, তাৰ উচ্চস্তৰীয় তদন্ত কৰা হ’ব। ভৱিষ্যতে এনে ঘটনা যাতে পুনৰ নঘটে, তাৰ বাবে চহৰৰ সকলো বন্ধ প্ৰকল্প পৰীক্ষা কৰাৰ নিৰ্দেশ দিয়া হৈছে।"

সাৱধানতামূলক ব্যৱস্থা হিচাপে প্ৰশাসনে সাময়িকভাৱে অঞ্চলটোৰ যাতায়াত বন্ধ কৰি দিছিল আৰু লোকসকলক ঘৰৰ ভিতৰতে থকিবলৈ পৰামৰ্শ দিছিল। বৰ্তমান পৰিস্থিতি সম্পূৰ্ণ নিয়ন্ত্ৰণত আছে বুলি জানিব পৰা গৈছে।