আজি পুৱতি নিশা বিহাৰৰ সমস্তিপুৰ জিলাত এক বৃহৎ অভিযান চলাই মানৱ সৰবৰাহকাৰীৰ কবলৰ পৰা অসমৰ ১১৫ গৰাকী যুৱক-যুৱতীক উদ্ধাৰ কৰা হৈছে। উদ্ধাৰ হোৱা সকলৰ ভিতৰত ৪৮ গৰাকী যুৱতী আৰু ৬৭ গৰাকী যুৱক আছে, যাৰ বহুতেই নাবালক। এই সফল অভিযানটো মিছন মুক্তি ফাউণ্ডেশ্যন, সশস্ত্ৰ সীমা বল (SSB) আৰু ৰাষ্ট্ৰীয় মানৱ অধিকাৰ আয়োগ (NHRC)ৰ তদাৰকত চলোৱা হৈছিল।
এই ঘটনাৰ সৈতে জড়িত থকাৰ অভিযোগত আৰক্ষীয়ে ৯ জনক গ্ৰেপ্তাৰ কৰিছে। প্ৰাথমিক তদন্তত পোহৰলৈ আহিছে যে এই সৰবৰাহকাৰী চক্ৰটোৱে অতি দুখীয়া পৰিয়ালসমূহক লক্ষ্য কৰি লৈছিল। বিশেষকৈ ভাৰত-ভূটান সীমান্তৱৰ্তী তামুলপুৰ জিলাৰ লগতে ওদালগুৰি জিলাৰ ভৈৰৱকুণ্ড, ডিমাকুছি আৰু বিশ্বনাথ চাৰিআলি, দুমদুমা, মঙলদৈ আদি অঞ্চলৰ পৰা যুৱক-যুৱতীসকলক ভুৱা প্ৰতিশ্ৰুতিৰে ফান্দত পেলাইছিল।
সৰবৰাহকাৰীসকলে কৃষি বিভাগত চৰকাৰী চাকৰি দিয়াৰ ভুৱা প্ৰতিশ্ৰুতিৰে এই যুৱক-যুৱতীসকলক আকৰ্ষিত কৰিছিল। চাকৰিৰ নামত তেওঁলোকৰ পৰা 'নিয়োগ মাচুল' হিচাপে টকাও সংগ্ৰহ কৰা হৈছিল। কিন্তু চাকৰি দিয়াৰ পৰিৱৰ্তে তেওঁলোকক বিহাৰৰ সমস্তিপুৰত এটা ভুৱা কল চেণ্টাৰত বন্দী কৰি ৰখা হৈছিল। তাত তেওঁলোকক শাৰীৰিক আৰু মানসিকভাৱে শোষণ কৰাৰ লগতে সন্দেহজনক নেটৱৰ্ক মাৰ্কেটিং আঁচনিত জড়িত হ'বলৈ বাধ্য কৰোৱা হৈছিল।
এই বৃহৎ উদ্ধাৰ অভিযানটোৱে অসমৰ পৰা মানৱ সৰবৰাহৰ এক গভীৰ শিপা থকা চক্ৰৰ কথা পুনৰ পোহৰলৈ আনিছে। আৰক্ষীয়ে বৰ্তমান গ্ৰেপ্তাৰ হোৱা সকলক জেৰা চলাই এই চক্ৰটোৰ আন সদস্যসকলক চিনাক্ত কৰিবলৈ চেষ্টা অব্যাহত ৰাখিছে। মানৱ সৰবৰাহৰ দৰে জঘন্য অপৰাধৰ বিৰুদ্ধে সমাজত সজাগতা বৃদ্ধি কৰাটো অত্যন্ত জৰুৰী বুলি বিভিন্ন মহলে মন্তব্য কৰিছে।
Continue Reading
