ডিজিটেল ডেস্কঃ শচীন তেণ্ডুলকাৰ আৰু বিনোদ কাম্বলী দুয়ো একেলগে পঢ়া-শুনা কৰিছিল আৰু একেলগেই খেলা-ধূলা কৰি আহিছে। লগতে অভিলেখো গঢ়িলে। ৯০ৰ দশকত ভাৰতীয় ক্ৰিকেটত নতুন উচ্চতাত উপনীত হোৱাৰ ক্ষেত্ৰত দুয়োৰে অংশীদাৰিত্ব সমান। কিন্তু বিনোদ কাম্বলীৰ কেৰিয়াৰৰ শেষ আৰম্ভণিৰ দৰে নহ’ল। সেই দৌৰত শচীন আগবাঢ়ি গ’ল। আনহাতে কাম্বলীৰ কেৰিয়াৰ একবিংশ শতিকাত প্ৰৱেশ কৰাৰ আগতেই স্তব্ধ হৈ পৰিছিল।
শচীনৰ এবছৰৰ পিছত অভিষেক ঘটোৱা বিনোদ কাম্বলিয়ে ২০০০ চনত অন্তিমখন আন্তঃৰাষ্ট্ৰীয় মেচ খেলিছিল। একে সময়তে শচীনে ২০১৩ চনত নিজৰ কেৰিয়াৰৰ পৰা বিদায় লয়। অৱসৰৰ পিছত শচীন আৰু কাম্বলি দুয়োজনে বিচিচিআইৰ পৰা পেঞ্চন লাভ কৰে। অৱশ্যে দুয়োৰে পেঞ্চনৰ পৰিমাণৰ পাৰ্থক্য আছে।
বিনোদ কাম্বলীতকৈ বেছি পেঞ্চন পায় শচীন টেণ্ডুলকাৰে। কিন্তু, প্ৰশ্নটো হ’ল কিমান? শচীন আৰু কাম্বলিয়ে লাভ কৰা পেঞ্চনত কিমান পাৰ্থক্য আছে? বিচিচিআইৰ পৰা প্ৰতিমাহে দুয়োজনে লাভ কৰা পেঞ্চনত ২০ হাজাৰ টকাৰ পাৰ্থক্য আছে। সহজ ভাষাত ক’বলৈ গ’লে প্ৰতিমাহে বিচিচিআইয়ে কাম্বলীতকৈ শচীনক ২০ হাজাৰ টকা বেছিকৈ দিয়ে।
এক প্ৰতিবেদন অনুসৰি প্ৰতিমাহে বিচিচিআইৰ পৰা শচীন টেণ্ডুলকাৰে লাভ কৰা পেঞ্চনৰ ধন ৫০ হাজাৰ টকা। একে সময়তে বিচিচিআইৰ পৰা বিনোদ কাম্বলিয়ে প্ৰতিমাহে ৩০ হাজাৰ টকা অৰ্থাৎ ২০ হাজাৰ টকা কম। বৰ্তমান কাম্বলিয়ে যি পৰিস্থিতিৰ মাজেৰে পাৰ হৈ গৈছে, সেই পৰিস্থিতিত বিচিচিআইৰ পৰা পোৱা পেঞ্চনটোৱেই তেওঁৰ একমাত্ৰ উপাৰ্জনৰ উৎস। সেই পেঞ্চনৰ ধনৰ উপৰিও শচীন ১৪০০ কোটি টকাৰ সম্পত্তিৰো মালিক।
ভাৰতীয় ক্ৰিকেটত বিনোদ কাম্বলী আৰু শচীন তেণ্ডুলকাৰৰ মাজত ডাঙৰ পাৰ্থক্য আছে। কাম্বলিয়ে আন্তঃৰাষ্ট্ৰীয় ক্ৰিকেট খেলিছিল মাত্ৰ ৯ বছৰ, আনহাতে শচীনে দুটা দশকৰো অধিক সময় খেলিছিল। ভাৰতৰ হৈ কাম্বলিয়ে ১৭খন টেষ্ট আৰু ১০৪খন এদিনীয়া খেলিছিল, য’ত সামগ্ৰিকভাৱে তেওঁ ৩৫০০ৰো অধিক ৰান সংগ্ৰহ কৰিছিল। আনহাতে শচীন টেণ্ডুলকাৰে ২০০ খন টেষ্ট, ৪৬৩ খন এদিনীয়া আৰু ১ টা টি-২০ খেলিছিল। এই সময়ছোৱাত তেওঁ মুঠ ৩৪৩৫৭ ৰান সংগ্ৰহ কৰি ১০০টা শতক অৰ্জন কৰে। বিনোদ কাম্বলী আৰু শচীন তেণ্ডুলকাৰৰ ক্ৰিকেটত এই পাৰ্থক্যৰ প্ৰভাৱ দুয়োজনে লাভ কৰা পেঞ্চনৰ ওপৰতো দেখা যায়।
Continue Reading
