খহি পৰিল বিদ্যালয়ৰ শৌচাগাৰৰ দেৱাল, পিষ্ট হৈ কৰুণ মৃত্যু ৩ শিক্ষাৰ্থীৰ

ডিজেটেল ডেস্ক : তামিলনাডুৰ তিৰুনেলভেলীত এখন বিদ্যালয়ত সংঘটিত হৈছে শোকাৱহ ঘটনা। বিদ্যালয়খনৰ শৌচাগাৰৰ এখন বেৰ ভাঙি পৰাৰ ফলত তিনিজন শিক্ষাৰ্থীৰ মৃত্যু হোৱাৰ লগতে আন চাৰিজন শিক্ষাৰ্থী আহত হৈছে। শ্বাফটাৰ উচ্চতৰ মাধ্যমিক বিদ্যালয়ত এই দুৰ্ঘটনাটো সংঘটিত হৈছে। বিদ্যালয়ৰ শৌচাগাৰ এটাৰ এখন দেৱাল ভাঙি পৰাৰ ফলত তাৰ তলত শিক্ষাৰ্থীকেইজন আবদ্ধ হৈ পৰে।

ফলত তিনিজনৰ ঠাইতে মৃত্যু হয়। মৃত্যু হোৱা ছাত্ৰকেইজন নৱম শ্ৰেণীৰ আনবাজহাগান, অষ্টম শ্ৰেণীৰ বিশ্ব ৰঞ্জন আৰু ৬ষ্ঠ শ্ৰেণীৰ সুথেশ বুলি চিনাক্ত কৰা হৈছে। এই শোকাৱহ ঘটনাৰ পাছতে মুখ্য মন্ত্ৰী এম কে ষ্টেলিনে শোক প্ৰকাশ কৰাৰ লগতে নিহত ছাত্ৰৰ পৰিয়াললৈ ১০লাখকৈ ক্ষতিপূৰণ দিয়াৰ কথা ঘোষণা কৰিছে।

আহত শিক্ষাৰ্থীকেইজনলৈও ৩লাখকৈ টকাৰ সাহায্য আগবঢ়াইছে। ৰাজ্যখনৰ শিক্ষামন্ত্ৰী অনবিল মহেশ পোয়ামোঝিয়ে এই ঘটনাক দুৰ্ভাগ্যজনক আখ্যা দিছে আৰু স্কুলখন তাৎক্ষণিকভাৱে পৰিদৰ্শনৰ নিৰ্দেশ দিছে।