AFSPA কেতিয়া প্ৰত্যাহাৰ কৰিব? ভাৰত চৰকাৰক বান্ধি দিলে দহদিন

ডিজিটেল ডেস্ক : কন্যাক গোষ্ঠীয়ে ১৫ জানুৱাৰীৰ পৰা কাৰ্যকৰী হোৱাকৈ AFSPAৰ বিৰুদ্ধে তেওঁলোকৰ চৰম প্ৰস্তাৱৰ ম্যাদ পুনৰ ১০দিনলৈ বৃদ্ধি কৰিছে। তেওঁলোকে ১০ জানুৱাৰীলৈকে চৰকাৰক প্ৰদান কৰা ৩০দিনৰ চৰম প্ৰস্তাৱৰ ম্যাদ উকলি যোৱাৰ পাছত পুনৰ আন ১০দিনলৈ বৃদ্ধি কৰিছে। জনজাতিটোৱে দাবী উত্থাপন কৰিছিল যে সাধাৰণ লোকৰ হত্যাৰ সৈতে জড়িত সকলো বিষয়া আৰু জোৱানৰ বিৰুদ্ধে অসামৰিক আদালতত গোচৰ ৰুজু কৰা হওক আৰু গ্ৰহণ কৰা পদক্ষেপৰ প্ৰতিবেদন ৰাজহুৱা কৰা হওক। স্বাভিমানী জাতি নগাসকলে তেওঁলোকৰ কন্যাক গোষ্ঠীৰ কেইজনমান লোকক সেনাই হত্যা কৰা ঘটনাক সহজভাৱে ল’ব পৰা নাই। ঘটনাৰ দিন পাৰ হৈ গৈ থকাৰ লগে লগে যেন ক্ষোভৰ অগনি অধিক বাঢ়িহে গৈছে নগাসকলৰ মনত। যোৱা বছৰৰ ৪ ডিচেম্বৰত ওটিঙত নিৰাপত্তাৰক্ষীয়ে ১৩জন সাধাৰণ লোকক গুলীয়াই হত্যা কৰিছিল। ঘটনাৰ এদিন পিছত পুনৰ মন চহৰত এক প্ৰতিবাদৰ সময়ত আন এজন নাগৰিক নিহত হয়। এই ঘটনাক কেন্দ্ৰ কৰি আজিও অশান্ত হৈ আছে উত্তৰ-পূব। কন্যাকসকলে উত্থাপন কৰা দাবী পূৰণত যদি চৰকাৰ ব্যৰ্থ হয়, তেন্তে ইষ্টাৰ্ণ নাগালেণ্ড পিপলছ অৰ্গেনাইজেচন (ENPO)ৰ এক প্ৰস্তাৱ অনুসৰি, জনজাতিটোৱে ইয়াৰ পৰম্পৰাগত অধিকাৰক্ষেত্ৰৰ ভিতৰত সকলো ৰাষ্ট্ৰীয় অনুষ্ঠানত সহযোগিতাৰ পৰা বিৰত থাকিব। লগতে কন্যাক সন্মিলনৰ সময়ত, জনজাতিটোৱে ওটিঙৰ নৰহত্যাক প্ৰতিনিধিত্ব কৰাকৈ মন চহৰৰ এটা প্ৰস্তাৱিত স্থানত ‘গণহত্যা উদ্যান’ স্থাপন কৰাৰো সংকল্প লৈছিল। কন্যাক ইউনিয়ন (KU), কন্যাক ষ্টুডেণ্টছ ইউনিয়ন (KSU) আৰু কন্যাক নিউপুহ শ্বেকো খোং (KNSK)এ জনাইছে যে ওটিঙৰ ৪ ডিচেম্বৰৰ ঘটনাৰ সকলো অৱশিষ্ট মন চহৰলৈ অনা হ'ব আৰু প্ৰস্তাৱিত উদ্যানত সংৰক্ষণ কৰা হ'ব। স্থানটো কন্যাক চিভিল চ’ছাইটী অৰ্গেনাইজেচন (CSO) দ্বাৰা দাবী কৰা হৈছিল আৰু জিলা প্ৰশাসনে আৱণ্টন কৰিছিল। লগতে, ১৪ ডিচেম্বৰত লংলেঙত গৃহীত ইএনপিঅ' প্ৰস্তাৱ অনুসৰি, ন্যায় প্ৰদান নোহোৱালৈকে ভাৰতীয় সশস্ত্ৰ বাহিনীৰ বিৰুদ্ধে ঘোষণা কৰা ‘অসহযোগ’ কাৰ্যকৰী হৈ থাকিব। জনজাতিটোৱে ভাৰতৰ ৰাষ্ট্ৰপতিৰ ওচৰত দাখিল কৰা দাবীবোৰত স্পষ্টকৈ উল্লেখ কৰে যে ‘৪ আৰু ৫ ডিচেম্বৰ, ২০২১ত ১৪জন নিৰীহ কন্যাক যুৱকৰ গণহত্যাত জড়িত ঘটনাটো অসামৰিক আদালতত বিচাৰ কৰিব লাগিব আৰু বিচাৰৰ প্ৰতিবেদন ৰাজহুৱা কৰিব লাগিব’। সন্মিলনখনে এইটোও সংকল্প লৈছিল যে অসামৰিক অধ্যুষিত অঞ্চলৰ ভিতৰত অৱস্থিত মন জিলাৰ ভিতৰত থকা সকলো নিৰ্ধাৰিত সেনা শিবিৰে তেওঁলোকৰ শিবিৰবোৰ অসামৰিক অঞ্চলৰ পৰা আঁতৰাই খালী কৰিব লাগিব। ইয়াত কোৱা হৈছে যে দুয়োপক্ষৰ পৰা প্ৰয়োজনীয় আনুষ্ঠানিকতা সম্পূৰ্ণ হোৱাৰ পিছত বিশেষ অনুসন্ধান দল (এছআইটি) আৰু সেনাৰ তদন্ত আদালতৰ প্ৰমাণিত প্ৰতিবেদন কনিয়াক ইউনিয়নৰ সৈতে পৰ্যৱেক্ষণৰ বাবে ভাগ বতৰা কৰিব লাগিব।