তললৈ টৰ্চ মাৰি হাতত জোঁৰ লৈ ওপৰলৈ চায়; 'ৰাম সেতু'ৰ পোষ্টাৰ দেখি ছ'চিয়েল মিডিয়াত 'হায় ৰাম!'

ডিজিটেল ডেস্ক : বছৰটোত এখন-দুখন চিনেমা কৰি বহি থকা ভকত নহয় অক্ষয় কুমাৰ। পাঁচ-ছখন চিনেমাৰে বছৰযোৰা ব্যস্ততা বলীউডৰ ‘খিলাড়ী’ৰ। শেহতীয়াকৈ অভিনেতাজনে দীপাৱলীত মুক্তি পাবলগীয়া তেওঁৰ ছবি 'ৰাম সেতু'ৰ এখন পোষ্টাৰ ছ'চিয়েল মিডিয়াত প্ৰচাৰ কৰে।

এই পোষ্টাৰক লৈ 'বিমল' পান মছলাৰ বিজ্ঞাপনত ভাগ লৈ দেশজুৰি সমালোচিত হোৱা অক্ষয় কুমাৰ পুনৰ ট্ৰ'লৰ সন্মুখীন হয় ছ’চিয়েল মিডিয়াত। অক্ষয়ে প্ৰকাশ কৰা 'ৰাম সেতু'ৰ পোষ্টাৰখনত অভিনেতাগৰাকীৰ লগতে তেওঁৰ সহ-অভিনেতা সত্য দেৱ আৰু জেকলিন ফাৰ্ণাণ্ডেজক দেখা গৈছে। অক্ষয় কুমাৰে হাতত এটা জোঁৰ লৈ আছে আৰু তিনিওগৰাকীয়ে অবাক হৈ ওপৰলৈ চাইছে। লগতে, পোষ্টাৰখনত জেকলিনৰ হাতত তললৈ পোহৰ দি থকা এটা টৰ্চো দেখা যায়। মহূৰ্ততে ভাইৰেল হোৱা পোষ্টাৰখনক লৈ ছ'চিয়েল মিডিয়াত যথেষ্ট ট্ৰ'লৰ সন্মুখীন হয় অক্ষময়-জেকলিন।

'ৰাম সেতু'ৰ পোষ্টাৰ দেখি ছ'চিয়েল মিডিয়া ব্যৱহাৰকাৰীয়ে ব্যংগাত্মকভাৱে বিস্ময় প্ৰকাশ কৰে। জেকলিনৰ হাতত এটা সুদৃশ্য টৰ্চ থকাৰ পাছতো অক্ষয়ে কিয় জোঁৰ লৈ ওপৰলৈ চাইছে বুলি বিভিন্নজনে আচৰিত হৈ মন্তব্য কৰিছে। জোঁৰ আৰু টৰ্চৰ ব্যৱহাৰৰ বাবে ছবিখনৰ পৰিচালকো সমালোচিত হৈছে। এজনে লিখিছে, 'যেতিয়া আপোনাৰ ঘৰত বিদ্যুৎ নাথাকে কিন্তু আপোনাৰ চুবুৰীয়াৰ ঘৰ উজ্জ্বল হৈ উঠে।' এগৰাকী ছ'চিয়েল মিডিয়া ব্যৱহাৰকাৰীয়ে হলীউডৰ ছবি 'নেশ্যনেল ট্ৰেজাৰ'ৰ প্ৰসংগও উত্থাপন কৰি 'এয়া নেশ্যনেল ট্ৰেজাৰৰ সস্তীয়া সংস্কৰণ' বুলিও অভিহিত কৰে। 

চলিত বৰ্ষৰ দীপাৱলীত ছবিগৃহত মুক্তি পাবলগীয়া 'ৰাম সেতু' চিনেমাখন পৰৱৰ্তী সময়ত অ'টিটি প্লেটফৰ্ম এমাজন প্ৰাইম ভিডিঅ'ত সম্প্ৰচাৰিত হ'ব।