মোদীক 'ৰাম',যোগী আদিত্যনাথক 'কৃষ্ণ' বুলি কৈ বিপদত পৰিল মুছলমান লোক! নিৰ্মম প্ৰহাৰ,হাস্পতালত ভৰ্তি

ডিজিটেল ডেস্কঃ প্ৰধানমন্ত্ৰী নৰেন্দ্ৰ মোদী আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথক প্ৰশংসা কৰাই কাল হ'ল এজন মুছলমান লোকৰ বাবে। কামৰাণ নামৰ লোকজনে প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী যোগী আদিত্যনাথক প্ৰশংসা কৰাৰ উপৰিও মোদীক ভগৱান ৰাম আৰু যোগী আদিত্যনাথক কৃষ্ণৰ লগত তুলনা কৰিছিল। কেন্দ্ৰীয় চৰকাৰৰ লগতে উত্তৰ প্ৰদেশ চৰকাৰৰ আঁচনি সমূহক জনকল্যাণমুখী আখ্যা দি প্ৰধানমন্ত্ৰী আৰু ৰাজ্যখনৰ মুখ্যমন্ত্ৰীক প্ৰশংসা কৰাৰ বাবেই স্থানীয় একাংশ লোকে নিৰ্মমভাৱে প্ৰহাৰ কৰে লোকজনক। 

এই ঘটনা সংঘটিত হৈছে উত্তৰ প্ৰদেশৰ বৰেলীত। উন্মত্ত লোকৰ প্ৰহাৰত কামৰাণে মূৰত গুৰুতৰভাবে আঘাত পাইছে। বৰ্তমান সংকটজনক অৱস্থাত জিলা চিকিৎসালয়ত ভৰ্তি হৈ আছে। কামৰাণৰ অভিযোগৰ ভিত্তিত আৰক্ষীয়ে এটা গোচৰ ৰুজু কৰিছে আৰু বিষয়টোৰ তদন্ত আৰম্ভ কৰিছে। ইফালে ঘটনাৰ সন্দৰ্ভত কামৰাণে কৈছে যে ''মই নিৰ্বাচনত বিজেপিক সমৰ্থন কৰিছিলোঁ। প্ৰধানমন্ত্ৰী নৰেন্দ্ৰ মোদী ৰামৰ অৱতাৰ। তেওঁ দেশখন খুব ভালদৰে চলাই আছে। সকলোবোৰেই পাইছে মানুহে। ৰেচনৰ পৰা আৰম্ভ কৰি সকলো পাইছে। মুখ্যমন্ত্ৰী যোগী কৃষ্ণৰ অৱতাৰ। কিন্তু মই এনেকৈ কোৱাত একাংশ মৌলবাদীয়ে প্ৰতিবাদ কৰিছিল।'' 

কামৰাণৰ অভিযোগৰ ভিত্তিত আৰক্ষীয়ে পাঁচজন লোকৰ বিৰুদ্ধে এজাহাৰ পঞ্জীয়ন কৰিছে আৰু গোচৰটোৰ তদন্ত কৰি আছে। বাৰাদাৰী আৰক্ষী থানাৰ পৰিদৰ্শক নীৰজ মালিকে ঘটনাৰ সন্দৰ্ভত কৈছে যে, ঘটনাত কামৰাণৰ ভতিজাকো জড়িত আছিল। উল্লেখ্য যে বিজেপিত যোগদান কৰা বা বিজেপিক প্ৰশংসা কৰাৰ বাবে কাৰোবাক প্ৰহাৰ কৰা এয়াই প্ৰথম ঘটনা নহয়। ইয়াৰ পূৰ্বে নিদা খানৰ বিৰুদ্ধেও এক পৰিৱেশ সৃষ্টি কৰাৰ চেষ্টা কৰা হৈছিল। কিছুদিনৰ পূৰ্বে এগৰাকী মুছলমান মহিলাক শহুৰেকৰ ঘৰৰ পৰা বাহিৰ কৰি দিয়া হৈছিল কিয়নো মহিলাগৰাকীয়ে উত্তৰ প্ৰদেশ বিধানসভা নিৰ্বাচনত বিজেপিক ভোট দিছিল।

আৰু পঢ়কঃ যি হে চৰা দাম! বিয়াত দৰা-কইনাক পেট্ৰ'ল-ডিজেল উপহাৰ দিলে বন্ধুবৰ্গই