জিম্বাবোৱে ভ্ৰমণৰ বাবে ভাৰতীয় দলৰ প্ৰশিক্ষকৰ দায়িত্বত ভিভিএছ লক্ষ্মণ

২৭ আগষ্টৰ পৰা আৰম্ভ হ’বলগীয়া এছিয়া কাপৰ প্ৰতি লক্ষ্য ৰাখিয়েই এই সিদ্ধান্ত লোৱা হৈছে বুলি জয় শ্বাহে উল্লেখ কৰিছে। অৱশ্যে লক্ষ্মণে ইয়াৰ পূৰ্বেও ভাৰতীয় দলৰ মুখ্য প্ৰশিক্ষকৰ দায়িত্ব বহন কৰিছিল। যোৱা জুন মাহত আয়াৰলেণ্ডৰ বিৰুদ্ধে অনুষ্ঠিত হোৱা টি-২০ শৃংখলাত লক্ষ্মণ ভাৰতীয় দলৰ প্ৰশিক্ষকৰ দায়িত্বত আছিল।

ভাৰতৰ জিম্বাবোৱে ভ্ৰমণ ২২ আগষ্টত অন্ত পৰিব আৰু তাৰ পাঁচ দিন পাছতেই ইউ এ ই- ত এছিয়া কাপ আৰম্ভ হ’ব। সেয়েহে ভাৰতীয় দলৰ নিয়মীয়া প্ৰশিক্ষক ৰাহুল দ্ৰাবিড় ভাৰতৰ এছিয়া কাপৰ বাবে ঘোষিত দলটোৰ সৈতে ব্যস্ত থাকিব।

বিচিচিআইৰ সচিব জয় শ্বাহে বিবৃতিটোত কয় যে তিনিখনীয়া এদিনীয়া শৃংখলাৰ বাবে জিম্বাবোৱেত ভিভিএছ লক্ষ্মণ ভাৰতীয় দলৰ প্ৰশিক্ষকৰ দায়িত্বত থাকিব। দ্ৰাবিড়ে এছিয়া কাপত অংশগ্ৰহণ কৰিবলগীয়া ভাৰতীয় দলটোৰ সৈতে ২৩ আগষ্টত ইউ.এ.ই.ত উপস্থিত হ'ব। যিহেতু দুয়োটা ইভেণ্টৰ মাজত ব্যৱধান কম, সেয়ে লক্ষ্মণক জিম্বাবোৱে ভ্ৰমণৰ বাবে ভাৰতীয় দলৰ দায়িত্ব দিয়া হৈছে বুলি শ্বাহে লগতে কয়।

উল্লেখ্য যে জিম্বাবোৱে ভ্ৰমণ কৰিবলগীয়া দলটোত এছিয়া কাপত খেলিবলগীয়া দুগৰাকীহে ক্ৰিকেটাৰ আছে। অপেনাৰ কে এল ৰাহুল আৰু দীপক হুডাৰ বাবে এছিয়া কাপৰ বাবে নিৰ্বাচিত হোৱা আনকেইগৰাকী ক্ৰিকেটাৰক জিম্বাবোৱে ভ্ৰমণৰ বাবে বিশ্ৰাম দিয়া হৈছে।

শ্বাহে জানিবলৈ দিয়া মতে ২২ আগষ্টত জিম্বাবোৱেৰ বিৰুদ্ধে শৃংখলাৰ পাছতে কে এল ৰাহুল আৰু দীপক হুডা এছিয়া কাপৰ বাবে হাৰাৰেৰ পৰা পোনে পোনে ডুবাইলৈ উৰা মাৰিব। কে এল ৰাহুলে আঘাতৰ পৰা আৰোগ্য হোৱাৰ পিছত দীৰ্ঘদিনৰ মূৰত ভাৰতীয় দললৈ প্ৰত্যাৱৰ্তন কৰিছে।

প্ৰথম অৱস্থাত জিম্বাবোৱে ভ্ৰমণৰ বাবে ৰাহুল নিশ্চিত নাছিল যদিও চিকিৎসকে তেওঁক সম্পূৰ্ণ ফিট বুলি ঘোষণা কৰাৰ পিছত দলত অন্তৰ্ভুক্ত কৰা হৈছিল। তদুপৰি পোন প্ৰথমে জিম্বাবোৱে শৃংখলাৰ বাবে শিখৰ ধাৱানক অধিনায়কত্বৰ দায়িত্ব দিয়া হৈছিল যদিও ৰাহুল দললৈ ঘূৰি অহাৰ পিছত ধাৱানৰ স্থানত ৰাহুলৰ হাতত অধিনায়কৰ বাব অৰ্পণ কৰা হয়। জিম্বাবোৱেৰ বিৰুদ্ধে তিনিখনীয়া শৃংখলাৰ এদিনীয়া মেচকেইখন ক্ৰমে ১৮, ২০ আৰু ২২ আগষ্টত হাৰাৰেত অনুষ্ঠিত হ'ব।