ডিজিটেল ডেস্কঃ বিখ্যাত কৌতুক শিল্পী ভাৰতী সিং আৰু জনপ্ৰিয় অভিনেতা তথা পৰিচালক শেখৰ সুমনৰ বাবে মুম্বাইৰ পৰা এক সুখবৰ আহিছে।
ধৰ্মীয় অনুভূতিত আঘাত কৰাৰ অভিযোগত ৰুজু হোৱা এক পুৰণি গোচৰৰ শুনানি গ্ৰহণ কৰি বম্বে উচ্চ ন্যায়ালয়ে দুয়োগৰাকী তাৰকাকে এক বৃহৎ সকাহ প্ৰদান কৰিছে। আদালতে তেওঁলোকৰ বিৰুদ্ধে থকা এজাহাৰ (FIR) খাৰিজ কৰাৰ নিৰ্দেশ দিছে।
জানিব পৰা মতে, এই বিতৰ্কৰ সূত্ৰপাত হৈছিল এটা জনপ্ৰিয় টিভি শ্ব’ৰ সময়ত। অনুষ্ঠানটোত ব্যৱহাৰ কৰা কিছুমান শব্দ আৰু কৰা মন্তব্যই এটা বিশেষ ধৰ্মৰ লোকৰ আৱেগত আঘাট সানিছে বুলি অভিযোগ উত্থাপন হৈছিল। ইয়াৰ পৰিপ্ৰেক্ষিততে বিভিন্ন ঠাইত তেওঁলোকৰ বিৰুদ্ধে আইনী ব্যৱস্থা গ্ৰহণৰ দাবী উত্থাপন কৰি এজাহাৰ দাখিল কৰা হৈছিল।
আদালতৰ পৰ্যবেক্ষণ
গোচৰটোৰ বিচাৰ কৰি বম্বে উচ্চ ন্যায়ালয়ৰ বিচাৰপীঠে গুৰুত্বপূৰ্ণ মন্তব্য কৰে। আদালতৰ মতে অভিযুক্তসকলৰ কোনো ধৰ্মীয় আৱেগক ইচ্ছাকৃতভাৱে আঘাত কৰাৰ বা সাম্প্ৰদায়িক সম্প্ৰীতি নষ্ট কৰাৰ কোনো দুৰভিসন্ধি নাছিল। কেৱল কৌতুক বা বিনোদনৰ বাবে কোৱা কথাক অপৰাধমূলক দৃষ্টিভংগীৰে চোৱাটো অনুচিত, যদিহে তাত কোনো বিদ্বেষমূলক উদ্দেশ্য নাথাকে।
ন্যায়ালয়ৰ এই ৰায়ৰ পিছত দীৰ্ঘদিন ধৰি আইনী মেৰপেচত আৱদ্ধ হৈ থকা ভাৰতী সিং আৰু শেখৰ সুমনে সকাহ লাভ কৰিছে। উল্লেখ্য যে, ভাৰতী সিঙে ইয়াৰ পূৰ্বেও তেওঁৰ মন্তব্যৰ বাবে ৰাজহুৱাভাৱে ক্ষমা প্ৰাৰ্থনা কৰিছিল আৰু জনাইছিল যে তেওঁ সকলো ধৰ্মকে সন্মান কৰে।
Continue Reading
