উজনিত মানৱ সৰবৰাহৰ ভয়ংকৰ জাল! ৫০ হাজাৰৰ পৰা ডেৰ লাখ টকাৰ বিনিময়ত বিক্ৰী হয় কিশোৰী-যুৱতী

ডিজিটেল ডেস্কঃ উজনি অসমৰ তিনিচুকীয়া জিলাত পোহৰলৈ আহিছে এটাৰ পাছত আন এটা মানৱ সৰবৰাহৰ ঘটনা । এইবাৰ ঘটনাৰ স্থান জিলাখনৰ ফিল'বাৰী । 

মানৱ সৰবৰাহকাৰীৰ কৱলত পৰিছে ফিল'বাৰী আৰক্ষী থানাৰ অন্তৰ্গত বৰগাঁওৰ এজন ক্ষুদ্ৰ চাহ খেতিয়কৰ চাহ বাগিছাত কৰ্মৰত এহাল দম্পতীৰ আঢ়ৈ বছৰীয়া কনমানি । 

উল্লেখ্য যে, ৪ নৱেম্বৰ তাৰিখে পেঙেৰী আৰক্ষী থানাৰ অন্তৰ্গত দুৱাৰমৰা চিংফৌ গাঁ‌ৱৰ চাহ বাগিচাত কৰ্মৰত শ্ৰমিকৰ তিনিগৰাকী কিশোৰীক এখন ৱেগনাৰ বাহনত নিবলৈ অহাৰ সময়তেই স্থানীয় আদিবাসী ছাত্ৰ সন্থাৰ কৰ্মকৰ্তাই বাহনখনৰ চালক ডুমডুমা টপোবনৰ দিপক ফুকনক কৰায়ক্ত কৰি সোধ-পোছ কৰাত পোহৰলৈ আহে উজনিত চলি থকা মানৱ সৰবৰাহৰ ভয়ংকৰ জাল । 

দিপক ফুকনে জানিবলৈ দিয়া অনুসৰি পিটৰ সোনা আৰু উমাকান্ত ছেত্ৰী (টিকে) নামৰ দুই মানৱ সৰবৰাহকাৰীয়ে ৮ হাজাৰ টকা গাড়ীভাৰা দি পঠিয়াইছিল দীপকক । লক্ষীমপুৰৰ হাৰমতিলৈ নিবলৈ কৈছিল কিশোৰী তিনিগৰাকীক । 

পৰিয়ালৰ অভিযোগ অনুসৰি পিটৰ সোনা নামৰ শিশু সৰবৰাহকাৰীটোৱে নিজকে চাহ জনগোষ্ঠীৰ এটা সংগঠনৰ নেতা হিচাপে চিনাকি দি কিশোৰী তিনিগৰাকীৰ পিতৃক ফুচলাই তিনি কিশোৰীক নিয়াৰ চেষ্টা কৰিছিল । 

উল্লেখযোগ্য যে, পিটৰ সোনা নামৰ এই মানৱ সৰবৰাহকাৰীটোৱে পূৰ্বতেও অঞ্চলটোৰ সহজ-সৰল চাহ শ্ৰমিক পৰিয়ালৰ কেইবাগৰাকীও কিশোৰী-যুৱতীক বহিঃৰাজ্যলৈ লৈ গৈ বিক্ৰী কৰাৰ তথ্য পোহৰলৈ আহিছে । আনকি, বিদ্যালয়ত অধ্যয়নৰত দুগৰাকী ছাত্ৰীকো কেইমাহমান পূৰ্বে বহিঃৰাজ্যলৈ নি বিক্ৰী কৰিছে । পিটৰ আৰু টিকেৰ নিৰ্দেশ মৰ্মে তিনি কিশোৰীক নিবলৈ অহা দীপক ফুকন নামৰ লোকজনক AS 23 AF 5952 নম্বৰৰ বাহনসহ ৰাইজে কৰায়ক্ত কৰি আৰক্ষীক গতাই দিয়ে ।

এই ঘটনাৰ পাছতেই সাংবাদিকৰ অনুসন্ধানত পোহৰলৈ আহিছে আন এক চাঞ্চল্যকৰ ঘটনা । পিটৰ আৰু টিকে নামৰ শিশু সৰবৰাহকাৰী দুটাই প্ৰায় ৫ মাহ পূৰ্বে মাইকেল বাৰ্লাৰ আঢ়ৈ বছৰীয়া এগৰাকী নাবালিকাক কৌশলেৰে বহিঃৰাজ্যত ডেৰ লাখ টকাৰ বিনিময়ত বিক্ৰী কৰাৰ চাঞ্চল্যকৰ তথ্য পোহৰলৈ আহিছে । 

আঢ়ৈ বছৰীয়া নাবালিকা গৰাকীৰ পিতৃ-মাতৃৰ হাতত প্ৰথমে ৫০ হাজাৰ টকা দি ভিডিঅ' প্ৰস্তুত কৰি পুনৰ সেই টকা পিটৰ আৰু টিকে নামৰ এই দুই মানৱ সৰবৰাহকাৰীয়ে লৈ উধাও হয় । বৰ্তমানেও কোনো অজ্ঞাত লোকৰ কৱলত আছে আঢ়ৈ বছৰীয়া নাবালিকা গৰাকী । উল্লেখযোগ্য যে, পিটৰ সোনাই অঞ্চলটোত নিজকে চাহ জনগোষ্ঠীৰ এটা সংগঠনৰ নেতা হিচাপে পৰিচয় দি অহাৰ বিপৰীতে উমাকান্ত ছেত্ৰী ওৰফে টিকে প্ৰায় ছয় মাহ পূৰ্বে মানৱ সৰবৰাহৰ ঘটনাৰ সৈতে জড়িত হৈ জেলৰ ভাত খাই আহিছে । সমগ্ৰ ঘটনা সন্দৰ্ভত পেঙেৰী আৰক্ষীয়ে উমাকান্ত ছেত্ৰী, পিটৰ চাখাৰীয়া, ৰহিত খাদাল, অজিত মুণ্ডা, দীপক ফুকন আৰু ববী দেউৰী চুনাক কৰায়ক্ত কৰিছে । 

বৰ্তমানেও পলাতক হৈ আছে মানৱ সৰবৰাহকাৰী চক্ৰৰ মূল মাষ্টাৰ মাইণ্ড পিটৰ সোনা । আৰক্ষীয়ে কৰায়ত্ত কৰা ববী দেউৰী সোনা পিটৰ সোনাৰ পত্নী । ঘটনাৰ তদন্ত আৰম্ভ কৰিছে পেঙেৰী আৰক্ষীয়ে ।