কাটিগড়াৰ হ’লি ফ্লাৱাৰ ছিনিয়ৰ ছেকেণ্ডাৰী স্কুলত হঠাৎ অসুস্থ হৈ কণমানি ছাত্ৰৰ কৰুণ মৃত্যু

ডিজিটেল ডেস্ক: কাটিগড়াৰ বেচৰকাৰী শিক্ষানুষ্ঠান হ’লি ফ্লাৱাৰ ছিনিয়ৰ ছেকেণ্ডাৰী স্কুলত আজি পুৱা সংঘটিত হয় এক শোকাবহ ঘটনা।

জানিব পৰা মতে, বিদ্যালয়খনত নিয়মীয়া পাঠদান চলি থকাৰ সময়ত হঠাৎ অসুস্থ হৈ পৰে এজন ছাত্ৰ। ঘটনাই তৎক্ষণাত চাঞ্চল্যৰ সৃষ্টি কৰে বিদ্যালয় চৌহদত।

প্ৰাথমিকভাৱে জানিব পৰা মতে, ছাত্ৰজনৰ ডিঙিত নুডলছ লাগি যোৱাৰ ফলতেই অসুস্থ হৈ পৰে বুলি সন্দেহ প্ৰকাশ কৰা হৈছে। বিদ্যালয় কৰ্তৃপক্ষই দ্ৰুতগতিত ছাত্ৰজনক কাটিগড়া মডেল হাস্পতাললৈ লৈ যায় যদিও চিকিৎসকে পৰীক্ষা কৰি ছাত্ৰজনক মৃত ঘোষণা কৰে। মৃত ছাত্ৰজনৰ নাম ছাকিব বুলি জানিব পৰা গৈছে।

ইফালে ঘটনাৰ খবৰ পোৱাৰ পিছতেই কাটিগড়া আৰক্ষী ঘটনাস্থলীত উপস্থিত হৈ সমগ্ৰ ঘটনাৰ তদন্ত আৰম্ভ কৰিছে। ছাত্ৰজনৰ আকস্মিক মৃত্যুক কেন্দ্ৰ কৰি বিদ্যালয়খনত শোকৰ ছাঁ পৰিছে। মৃত্যুৰ সঠিক কাৰণ জানিবলৈ আৰক্ষীয়ে প্ৰয়োজনীয় আইনী প্ৰক্ৰিয়া অব্যাহত ৰাখিছে।