ডিজিটেল ডেস্কঃ অগ্নিক সাক্ষী কৰি এগৰাকী যুৱতীক নিজৰ জীৱনসংগী ৰূপে মানি লৈছিল হাৰিয়ানাৰ কৰ্ণাল জিলাৰ নিবাসী এজন যুৱকে ৷ বহু সপোন আৰু আশাৰে জীৱনটো জীয়াম বুলি বিবাহপাশত আৱদ্ধ হৈছিল দুয়ো ৷ কিন্তু কইনাই বুজি নাপালে দৰাৰ মৰম আৰু আব্দাৰ ৷
আজিকালি জানো মৰম ভালপোৱাৰে পৃথিৱী ঘূৰে ৷ সেয়েহে বিয়াৰ পিছদিনাই কইনাজনীয়ে শহুৰেকৰ পৰা পোৱা গহনা আৰু নগদ ধন লৈ পলাই যায়। ঘটনা সন্দৰ্ভত আৰক্ষীক অভিযোগ দিছে ভুক্তভোগী দৰাজনে। আৰক্ষীয়ে ভুক্তভোগী দৰাৰ অভিযোগৰ ভিত্তিত গোচৰ ৰুজু কৰি কইনাৰ সন্ধান আৰম্ভ কৰিছে। আৰক্ষীক দিয়া এজাহাৰত ভুক্তভোগীয়ে কয় যে তেওঁ কুঞ্জপুৰা থানা এলেকাৰ বাসিন্দা। দিল্লীৰ লোধি ৰোডত এগৰাকী ছোৱালীৰ সৈতে বিবাহপাশত আবদ্ধ হৈছিল তেওঁ। ১০ নৱেম্বৰত দুয়োৰে বিবাহ হয় ৷
বিয়াৰ পিছদিনা শাহু-বোৱাৰী ঘৰত আছিল। বোৱাৰীয়েকে শাহুৱেকক ঠগি ঘৰৰ পৰা ওলাই যায় কিন্তু আকৌ ঘৰলৈ ঘূৰি নাহিল। দৰাজনে আৰক্ষীক কয়,‘‘আমিও তেওঁক বিচাৰিলোঁ যদিও তেওঁৰ কোনো লেখ-জোখ পোৱা নাছিলো।’’ তেওঁ ক’লে যে তেওঁৰ পত্নীয়ে ঘৰৰ পৰা ওলাই অহাৰ সময়ত গোলাপী ৰঙৰ লেহেংগা পিন্ধিছিল। সোণৰ কাণফুলি, সোণৰ হাৰ, সোণৰ আঙঠি আৰু ৰূপৰ পায়ল এযোৰ লগতে লৈ যায়। লগতে প্ৰায় ৫ হাজাৰ টকা নগদ ধন। অতি সোনকালে পত্নীক বিচাৰি উলিয়াবলৈ তেওঁ আৰক্ষীক আবেদন জনাইছে।
এই গোচৰৰ সন্দৰ্ভত আৰক্ষীয়ে জানিবলৈ দিয়ে যে পত্নীৰ নিৰুদ্দেশৰ অভিযোগ ভুক্তভোগীৰ স্বামীয়ে কৰিছে। অভিযোগৰ ভিত্তিত গোচৰ ৰুজু কৰা হৈছে। তেওঁৰ সন্ধান বৰ্তমান অব্যাহত। আৰক্ষীয়ে জনোৱা মতে, চিচিটিভিৰ ফুটেজত তেওঁক ঘৰৰ পৰা ওলাই যোৱা দেখা গৈছে। অতি সোনকালে তেওঁক বিচাৰি উলিওৱা হ’ব।
Continue Reading
