ডিজিটেল ডেস্কঃ সম্প্ৰতি ধৰ্মীয় অনুষ্ঠানত লাউডস্পীকাৰ ব্যৱহাৰ এক অঘোষিত প্ৰতিযোগিতাত পৰিণত হোৱা পৰিলক্ষিত হৈছে৷ এই সন্দৰ্ভত বম্বে উচ্চ ন্যায়ালয়ে এটা গোচৰত মন্তব্য প্ৰদান কৰিছে যে কোনো ধৰ্মৰ বাবে লাউডস্পীকাৰ অপৰিহাৰ্য নহয়। আনহাতে, শব্দ প্ৰদূষণ হ্ৰাস কৰাৰ বাবে যাৱতীয় পদক্ষেপ গ্ৰহণ কৰিবৰ বাবে মহাৰাষ্ট্ৰ চৰকাৰক নিৰ্দেশ প্ৰদান কৰে আদালতে। আৰু লাউডস্পীকাৰ ব্যৱহাৰ নিষিদ্ধকৰণে কোনো ধৰ্মৰ অধিকাৰ খৰ্ব কৰা নাই বুলি উল্লেখ কৰে। শব্দ প্ৰদূষণৰ ফলত প্ৰায়ে গুৰুতৰ শাৰীৰিক ৰোগৰ সৃষ্টি কৰা দিশত আদালতে লক্ষ্য কৰিছিল। গতিকে প্ৰদূষণ নিয়ন্ত্ৰণৰ প্ৰয়োজন।
উল্লেখ্য যে ভাৰতীয় সংবিধানৰ ১৯ আৰু ২৫ নং অনুচ্ছেদত নাগৰিকক মত প্ৰকাশ আৰু ধৰ্মৰ স্বাধীনতা নিশ্চিত কৰা হৈছে। বোম্বাই উচ্চ ন্যায়ালয়ৰ ন্যায়াধীশ অজয় গাডকাৰী আৰু শ্যাম চান্দোকৰ বিচাৰপীঠে কয় যে লাউডস্পীকাৰ ব্যৱহাৰ নিষিদ্ধ কৰিলে সংবিধানৰ দুয়োটা অনুচ্ছেদৰ কোনো এটাই উলংঘা নহয়। লাউডস্পীকাৰৰ শব্দ নিয়ন্ত্ৰণৰ বাবে সংশ্লিষ্ট সকলো ধৰ্মীয় স্থানৰ কৰ্তৃপক্ষক নিৰ্দেশ দিবলৈ মহাৰাষ্ট্ৰ চৰকাৰক নিৰ্দেশ প্ৰদান কৰিছে আদালতে। লাগতে বিষয়টো গুৰুত্বসহকাৰে বিবেচনা কৰিবলৈ আহ্বান জনাইছে।
মহাৰাষ্ট্ৰৰ বিভিন্ন প্ৰান্তৰ মুঠ ৯টা মছজিদ আৰু মাদ্ৰাছাত লাউডস্পীকাৰ ব্যৱহাৰৰ বিৰুদ্ধে থানাত এজাহাৰ দাখিল কৰা হৈছিল। আৰু ধৰ্মীয় স্থানত লাউডস্পীকাৰ ব্যৱহাৰৰ ফলত সৃষ্টি হোৱা শব্দ প্ৰদূষণৰ বাবেও বহু লোক অসুস্থ হৈ পৰাৰ দাবী উত্থাপন কৰি উচ্চ ন্যায়ালয়ত গোচৰটো দাখিল কৰে।
ন্যায়ালয়ে সকলোতে লাউডস্পীকাৰৰ ভলিউম নিয়ন্ত্ৰণ কৰিব লাগিব বুলি স্পষ্টভাৱে কয়। আৰু যিকোনো ধৰ্মৰ পূজাস্থলীৰ ক্ষেত্ৰত এই কথা প্ৰযোজ্য হ’ব বুলি সদৰি কৰে। প্ৰয়োজন হ’লে প্ৰশাসনে লাউডস্পীকাৰৰ ব্যৱহাৰতো নিষেধাজ্ঞা আৰোপ কৰিব পাৰে বুলি উল্লেখ কৰিছে বম্বে উচ্চ ন্যায়ালয়ে।
Continue Reading
