ডিজিটেল ডেস্কঃ দিল্লী আয়কৰ বিভাগে ৫০০ টা গোচৰ চিনাক্ত কৰিছে য’ত ভাৰতীয়ই ডুবাইত স্থাৱৰ সম্পত্তি ক্ৰয় কৰিছিল কিন্তু চৰকাৰী ভাৱে পঞ্জীয়ন কৰা নাই। এই ক্ষেত্ৰত কৰ বিভাগে বৃহৎ ব্যৱস্থা গ্ৰহণৰ প্ৰস্তুতি চলাইছে। দিল্লীত কৰ বিভাগে চলোৱা অভিযানত ৭০০ কোটিৰো অধিক মূল্যৰ লেনদেন ধৰা পৰিছে যিবোৰৰ আজিলৈকে কোনো হিচাপ নাই।
এক প্ৰতিবেদন অনুসৰি আয়কৰ বিভাগৰ দিল্লীস্থিত তদন্ত শাখাই এক ডজনৰো অধিক জৰীপ আৰু অনুসন্ধান অভিযান চলাইছে য’ত ডুবাইত ৪৩টা অঘোষিত সম্পত্তিৰ প্ৰমাণ পোৱা গৈছে। কেৱল দিল্লীতে ধৰা পৰিছে ৭০০ কোটি টকাৰ কৰ ফাঁকিৰ নথি-পত্ৰ। প্ৰতিবেদনত এজন বিষয়াৰ উদ্ধৃতি দি কোৱা হৈছে যে যদি এই তদন্ত সমগ্ৰ দেশতে বিয়পি পৰে, তেন্তে কৰ ফাঁকিৰ এই গোচৰটো হাজাৰ কোটি টকা হ’ব পাৰে। প্ৰতিবেদন অনুসৰি আয়কৰ বিভাগে ডুবাইত ভাৰতীয়ই ক্ৰয় কৰা অঘোষিত স্থাৱৰ সম্পত্তিৰ সৈতে জড়িত ৫০০ৰো অধিক গোচৰ ধৰা পেলাইছে, য’ত বিভাগটোৱে ব্যৱস্থা গ্ৰহণৰ বাবে সাজু হৈছে।
শেহতীয়াকৈ জাৰ্মানীয়ে পশ্চিম এছিয়াত থকা ভাৰতীয়ৰ সম্পত্তিৰ তথ্য ভাৰতৰ সৈতে আলোচনা কৰিছে। এই তথ্য দুয়োখন দেশৰ মাজত ডাবল টেক্সেচন এভয়ডেন্স এগ্ৰিমেণ্ট (ডিটিএএ)ৰ অধীনত তথ্য বিনিময়ৰ অধীনত কৰা হৈছে। ইয়াত ১০০০ৰো অধিক ভাৰতীয় নাগৰিকৰ মালিকানাধীন সম্পত্তি ধৰা পৰিছে। অৱশ্যে জাৰ্মান কৰ্তৃপক্ষই এই তথ্য কেনেকৈ লাভ কৰিলে সেয়া স্পষ্ট হোৱা নাই।
দিল্লীত আয়কৰ বিভাগৰ অভিযানৰ সময়ত কৰদাতাসকলে অঘোষিত নগদ ধনত ১২৫ কোটিতকৈ অধিক টকা বিনিয়োগ কৰা বুলি স্বীকাৰ কৰিছে। আয়কৰ বিভাগে নগদ ধন পৰিশোধ আৰু ক্ৰয়ৰ ভুৱা ৰচিদ আৰু ৰেকৰ্ড উদ্ধাৰ কৰিছে যাৰ তদন্ত অব্যাহত আছে। বিদেশত হিচাপহীন নগদ ধন জমা কৰাৰ উপায়, অঘোষিত নগদ ধন জমা কৰাৰ উপায় আৰু ইয়াৰ লগত ক’লা ধন জড়িত হোৱাৰ সম্ভাৱনাৰ তদন্ত চলাইছে বিভাগটোৱে। কৰ বিভাগে আয়কৰ আইন বা ক’লা ধন আইনৰ অধীনত এই গোচৰ ব্যৱস্থা লোৱাৰো চিন্তা-চৰ্চা কৰিছে।
Continue Reading
