ডিজিটেল ডেস্কঃ খালিস্তানী সন্ত্ৰাসবাদী হৰদীপ সিং নিজ্জাৰৰ হত্যাক লৈ ভাৰত আৰু কানাডাৰ মাজত আৰম্ভ হোৱা সংঘাতৰ এতিয়ালৈকে ওৰ পৰা নাই। এনে সংঘাতৰ পৰিণতিতে কানাডাই ভাৰতৰ পৰা ৪১ জন কূটনীতিক নিজৰ দেশলৈ ওভতাই নিছে। নতুন দিল্লীয়ে পূৰ্বে কৈছিল যে শুক্ৰবাৰৰ ভিতৰত কমেও ৪০ জন কূটনীতিকক কানাডাই ওভতাই নিব লাগিব। সেই সময়সীমা শেষ হোৱাৰ পূৰ্বেই কানাডাই ভাৰতৰ পৰা মুঠ ৪১ জন কূটনীতিকক স্থানান্তৰ কৰিছে।
জুন মাহত কানাডাৰ ব্ৰিটিছ কলম্বিয়া প্ৰদেশত খালিস্তান পন্থী নেতা হৰদীপ সিং নিজ্জাৰক হত্যা কৰা হৈছিল। কানাডাৰ সংসদৰ মজিয়াত কানাডাৰ প্ৰধানমন্ত্ৰী জাষ্টিন ট্ৰুডোৱে নেতাজনৰ হত্যাৰ আঁৰত ভাৰতৰ হাত থকাৰ অভিযোগ উত্থাপন কৰিছিল। তেতিয়াৰে পৰা ভাৰত-কানাডাৰ উত্তেজনা অব্যাহত আছে।
ভাৰতত মুঠ ৬১ জন কানাডাৰ কূটনীতিবিদ আছে। ৪১ জনক কানাডাই ঘূৰাই নিয়াৰ পিছত ভাৰতত আন ২০ জনে কাম কৰিব। বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে স্পষ্ট কৰি দিছে যে নতুন দিল্লীত কানাডাৰ কূটনীতিকৰ সংখ্যা কানাডাত থকা ভাৰতীয় কূটনীতিকৰ সংখ্যাতকৈ বহু বেছি। ভাৰতে দুয়োখন দেশৰ মাজত সমতা বজাই ৰাখিবলৈ ৪০ জন কূটনীতিকক ঘূৰাই অনাৰ নিৰ্দেশ দিছে। নতুন দিল্লীয়ে স্পষ্ট কৰি দিছে যে যদি শুক্ৰবাৰৰ ভিতৰত ৪০ জন কূটনীতিকক অপসাৰণ কৰা নহয়, তেন্তে ২১ জন কূটনীতিক আৰু তেওঁলোকৰ পৰিয়ালৰ বাহিৰে আন সকলোকে ভাৰত এৰাৰ নিৰ্দেশ দিয়া হ’ব।
ভাৰতৰ কঠোৰ স্থিতিৰ পিছত কানাডাই ৪১ জন কূটনীতিকক প্ৰত্যাহাৰ কৰাৰ সিদ্ধান্ত লয় । কানাডাৰ বৈদেশিক মন্ত্ৰী মেলানিয়া জোলিয়ে কয়, "২১ জন কানাডাৰ কূটনীতিক আৰু তেওঁলোকৰ পৰিয়ালৰ বাহিৰে বাকীসকলক প্ৰত্যাহাৰ কৰিবলৈ বাধ্য কৰোৱা হৈছে।" আমি তেওঁলোকক ভাৰতৰ পৰা সুৰক্ষিতভাৱে উলিয়াই আনিছো। " তেওঁ লগতে কয় যে ৪১ জন কূটনীতিকৰ কূটনৈতিক বিশেষাধিকাৰ প্ৰত্যাহাৰ কৰাৰ ভাবুকি কেৱল অভূতপূৰ্বই নহয়, আন্তঃৰাষ্ট্ৰীয় আইন বিৰুদ্ধও।
Continue Reading
