ডিজিটেল ডেস্কঃ ন্যায়াধীশক দৰমহা দিয়াত পলম হোৱাৰ বিষয়টোক লৈ মঙলবাৰে ৰাজ্য চৰকাৰসমূহক কঠোৰ ভাষাৰে সমালোচনা কৰে উচ্চতম ন্যায়ালয়ে। উচ্চতম ন্যায়ালয়ে ৰাজ্য চৰকাৰসমূহক সমালোচনা কৰি কয় যে তেওঁলোকৰ বিনামূলীয়া আঁচনিৰ বাবে ধন ওলায়, কিন্তু কিন্তু ন্যায়াধীশক দৰমহা দিবলৈহে ধন নাই। ন্যায়াধীশৰ দৰমহাৰ ক্ষেত্ৰত বিত্তীয় সংকটৰ কথা কয় ৰাজ্য চৰকাৰে।
ন্যায়াধীশ বি আৰ গবই আৰু ন্যায়াধীশ এ জি মছিহে ন্যায়াধীশসকলৰ দৰমহাৰ সৈতে জড়িত এখন আৱেদনৰ শুনানি লৈ কয়, 'ৰাজ্যসমূহৰ হাতত বিনামূলীয়া আঁচনিৰ বাবে ধনৰ অভাৱ নহয়, কিন্তু ন্যায়াধীশৰ দৰমহা-পেঞ্চন দিবলৈ ধনে নোজোৰে। এই প্ৰসংগত দিল্লীৰ বিধানসভা নিৰ্বাচনত বিভিন্ন দলে ঘোষণা কৰা বিভিন্ন আঁচনিৰ কথাও উল্লেখ কৰে।
বিচাৰপীঠখনে কয়, 'ন্যায়াধীশৰ দৰমহা দিয়াৰ কথা ওলালে ৰাজ্যসমূহে বিত্তীয় সংকটৰ কথা কয়। কিন্তু নির্বাচন আহিলে তেওঁলোকে লাডলী বেহনাৰ দৰে আন আঁচনি কাৰ্যকৰী কৰাৰ কথা কয়। যদি দিল্লীলৈ চায় তেতিয়া দেখিব যে ইয়াত ৰাজনৈতিক দলসমূহে এই বুলি প্রতিশ্রুতি দিছে যে তেওঁলোক ক্ষমতালৈ আহিলে ২১০০, ২৫০০ টকাকৈ দিব। ৰাজ্য চৰকাৰৰ হাতত কাম নকৰা মানুহক দিবলৈ ধন থাকে।'
সৰ্বভাৰতীয় ন্যায়াধীশ সন্থাই ২০১৫ চনত দাখিল কৰা ন্যায়াধীশৰ বেতন আৰু অৱসৰৰ সময়ত লাভ সা-সুবিধাসমূহক লৈ উক্ত আৱেদনখন দাখিল কৰিছিল।
