ডিজিটেল ডেস্কঃ ২০২৪-২৫ বিত্তীয় বৰ্ষত ভাৰতৰ অৰ্থনৈতিক বিকাশৰ হাৰ হ্ৰাস পাই চাৰি বছৰৰ ভিতৰত নিম্নতম হব। প্রস্তুতকৰণ আৰু সেৱা খণ্ডত দেখা দিয়া দুৰ্বল প্ৰদৰ্শনৰ বাবেই মঙলবাৰে চৰকাৰে প্ৰকাশ কৰা তথ্যত ২০২৪-২৫ বৰ্ষত ভাৰতৰ অৰ্থনৈতিক বিকাশৰ হাৰ ৬.৪ শতাংশ হ'ব বুলি কোৱা হৈছে।
উল্লেখযোগ্য যে কভিডৰ বৰ্ষৰ (২০২০-২১) পাছত মুঠ ঘৰুৱা উৎপাদনৰ (জিডিপি) হাৰ ৬.৪ শতাংশ হৈছে আটাইতকৈ কম। উক্ত বিত্তীয় বৰ্ষত ভাৰতৰ অৰ্থনৈতিক বিকাশ বা জি ডি পিৰ হাৰ আছিল ৫.৮ শতাংশ। তাৰ পাছৰ বিত্তীয় বর্ষত (২০২১-২২) জি ডি পিৰ হাৰ আছিল ৯.৭ শতাংশ।
তেনেদৰে ২০২২-২৩ বৰ্ষত ৭ শতাংশ আৰু যোৱা বিত্তীয় বৰ্ষত জি ডি পিৰ হাৰ আছিল ৮.২ শতাংশ। উল্লেখযোগ্য যে মঙলবাৰে ৰাষ্ট্ৰীয় পৰিসংখ্যা কার্যালয়ে (এন এছ অ') প্ৰকাশ কৰা ২০২৪-২৫ বৰ্ষৰ ৰাষ্ট্ৰীয় আয়ৰ প্ৰথম অগ্রিম প্রাককলন ২০২৪ চনৰ ডিচেম্বৰত ভাৰতীয় ৰিজার্ভ বেংকে কৰা প্ৰাককলন ৬.৬ শতাংশতকৈ কম।
বিত্তীয় মন্ত্ৰালয়ে কৰা প্ৰাককলন ৬.৫-৭ শতাংশতকৈও ই কম। এই অগ্রিম প্রাককলন অহা ১ ফেব্ৰুৱাৰীত লোকসভাত বিত্ত মন্ত্রী নির্মলা সীতাৰমণে দাখিল কৰিবলগীয়া কেন্দ্ৰীয় বাজেটৰ প্রস্তুতিত ব্যৱহাৰ কৰা হ'ব। প্ৰস্তুতকৰণ খণ্ডত বিকাশৰ হাৰ যোৱা বছৰৰ ৯.৯ শতাংশৰ পৰা ৫.৩ শতাংশলৈ হ্রাস পাব। আনহাতে সেৱা খণ্ডত বিকাশৰ হাৰ যোৱা বছৰৰ ৬.৪ শতাংশৰ পৰা ৫.৮ শতাংশলৈ হ্রাস পাব।
