ডিজিটেল ডেস্কঃ আজানৰ লাউডস্পীকাৰ আৰু হনুমান চালিছাক লৈ আৰম্ভ হোৱা বিতৰ্ক এতিয়া তুংগত আছে। এই বিষয়টোক লৈ মুম্বাইৰ পৰা দিল্লীলৈ ৰাজনৈতিক হুলস্থূল আৰম্ভ হৈছে। এনে সময়তে এনচিপি কৰ্মী ফাহমিদা হাছানে কেন্দ্ৰীয় গৃহমন্ত্ৰী অমিত শ্বাহলৈ প্ৰধানমন্ত্ৰীৰ বাসগৃহৰ বাহিৰত হনুমান চালিছাৰ সৈতে অন্যান্য ধৰ্মীয় পাঠ আবৃত্তি কৰাৰ অনুমতি বিচাৰি এখন পত্ৰ লিখিছে। মহাৰাষ্ট্ৰৰ পৰা আৰম্ভ হোৱা হনুমান চালিছাক লৈ ৰাজনৈতিক কাজিয়া এতিয়াও শেষ হোৱা নাই।
নেচনেলিষ্ট কংগ্ৰেছ পাৰ্টিৰ (এনচিপি) নেতা ফাহমিদা হাছান খানে তেওঁক প্ৰধানমন্ত্ৰীৰ বাসগৃহৰ বাহিৰত হনুমান চালিচা পঢ়িবলৈ অনুমতি দিয়াৰ দাবী জনাইছে। তেওঁ পত্ৰখনত লিখিছে যে ''মই ফাহমিদা হাছানে আপোনাক কাতৰেৰে নিবেদন কৰি জনাইছো যে মোক প্ৰধানমন্ত্ৰী নৰেন্দ্ৰ মোদীৰ বাসগৃহৰ বাহিৰত হনুমান চালিচা, নৱকৰ মন্ত্ৰ, গুৰু গ্ৰন্থ আৰু নোভিনো পঢ়িবলৈ অনুমতি প্ৰদান কৰক। অনুগ্ৰহ কৰি মোক দিন আৰু সময় কওঁক।'' ফাহমিদা হাছান খানৰ এই দাবীক সাংসদ নৱনীত ৰাণা আৰু তেওঁৰ স্বামী ৰবি ৰাণাৰ দাবীৰ সৈতে সম্পৰ্কিত হিচাপে দেখা গৈছে।
ছ'চিয়েল মিডিয়াতো মানুহে কৈছে যে নৱনীত ৰাণাৰ ঘোষণাৰ পিছত এয়া এনচিপিৰ প্ৰতিক্ৰিয়া। নৱনীত ৰাণা আৰু তেওঁৰ স্বামী ৰবি ৰাণাই ঘোষণা কৰিছিল যে দুয়োজনে উদ্ধৱ ঠাকৰেৰ পৈতৃক ঘৰ মাতোশ্ৰীৰ বাহিৰত হনুমান চালিচা পঢ়িব। তেওঁলোকে মহাৰাষ্ট্ৰৰ মুখ্যমন্ত্ৰী উদ্ধৱ ঠাকৰেৰ বাসগৃহ মাতোশ্ৰীৰ বাহিৰত হনুমান চালিচা আবৃত্তি কৰাৰ কথা কৈছিল, যিয়ে শিৱসেনাৰ কৰ্মীসকলক অত্যন্ত উত্তেজিত কৰি তুলিছিল আৰু তেওঁলোকে ৰাণাৰ বাসগৃহৰ সন্মুখত প্ৰতিবাদ সাব্যস্ত কৰিছিল।
মুম্বাই আৰক্ষীয়ে ৰাণা দম্পতীৰ বিৰুদ্ধে এখন এজাহাৰ পঞ্জীয়ন কৰে আৰু পাছত ইয়াত ৰাজদ্ৰোহৰ অভিযোগ উত্থাপিত হয়। দেওবাৰে মুম্বাইৰ এখন আদালতে ৰাণা দম্পতীক ১৪ দিনৰ ন্যায়িক জিম্মালৈ প্ৰেৰণ কৰে। পিছত দেওবাৰে নিশা অমৰাৱতীৰ সাংসদ নৱনীত ৰাণাক বাইকুল্লা মহিলা কাৰাবাসলৈ লৈ যোৱা হয়।
আনহাতে তেওঁৰ স্বামী আৰু বিধায়ক ৰবি ৰাণাক নৱী মুম্বাইৰ তালোজা কাৰাগাৰত বন্দী কৰি ৰখা হৈছে। ফাহমিদা হাছান খানে কৈছিল যে তেওঁ দিল্লীৰ লোক কল্যাণ মাৰ্গত প্ৰধানমন্ত্ৰী মোদীৰ চৰকাৰী বাসভৱনৰ বাহিৰত নামাজ, হনুমান চালিচা, দুৰ্গা চালিচা, নমোকাৰ মন্ত্ৰ আৰু বহুতো ধৰ্মীয় পাঠ পঢ়িব বিচাৰে। ফাহমিদাই কৈছিল যে তেওঁ হনুমান চালিচা পাঠ কৰে আৰু তেওঁৰ ঘৰত দুৰ্গা পূজাও পতা হয়। NCP কৰ্মী ফাহমিদা হাছানৰ এই পত্ৰক লৈ সমগ্ৰ ৰাজনৈতিক মহলতে চলিছে সৰৱ চৰ্চা।
Continue Reading
