ডিজিটেল ডেস্কঃ এইয়া নহয় হলীউড বা বলীউডৰ থ্ৰীলাৰ চিনেমা, এইয়া হায়দৰাবাদৰ এক চাঞ্চল্যকৰ ঘটনা ৷ হায়দৰাবাদৰ এজন লোকে পত্নীক হত্যা কৰি মৃতদেহটো টুকুৰা টুকুৰ কৰি প্ৰেচাৰ কুকাৰত উতলাই অপৰাধটো লুকুৱাবলৈ চেষ্টা কৰাৰ অভিযোগ উত্থাপন হৈছে। প্ৰতিৰক্ষা গৱেষণা আৰু উন্নয়ন সংস্থাৰ নিৰাপত্তাৰক্ষী হিচাপে কাম কৰা ৪৫ বছৰীয়া প্ৰাক্তন সেনা জোৱান গুৰু মূৰ্তিয়ে আৰক্ষীৰ আগত অপৰাধ স্বীকাৰ কৰা বুলি জানিব পৰা গৈছে যদিও তেওঁৰ ভয়ানক কাহিনী এতিয়াও নিশ্চিত হোৱা নাই।
যোৱা ১৬ জানুৱাৰীত ভেংকট মাধৱী (৩৫) নিৰুদ্দেশ হোৱাৰ খবৰ দিছিল পৰিয়ালে। আৰক্ষীয়ে তদন্ত আৰম্ভ কৰাৰ লগে লগে তেওঁৰ স্বামীক সন্দেহ কৰে। যেতিয়া তেওঁলোকে তেওঁক সোধা-পোছা কৰে তেতিয়া তেওঁ এটা ভয়ংকৰ অপৰাধৰ সবিশেষ প্ৰকাশ কৰে।
আৰক্ষী পৰিদৰ্শক নাগাৰাজুৱে কয় যে, "পিতৃ-মাতৃয়ে আমাৰ ওচৰত নিৰুদ্দেশৰ অভিযোগ দাখিল কৰিছিল। স্বামীও তেওঁলোকৰ সৈতে আহিছিল। আমি সন্দেহ কৰি জেৰা কৰিছিলো। তেওঁ অপৰাধ স্বীকাৰ কৰে।" গুৰু মূৰ্তিয়ে বাথৰুমত পত্নীৰ মৃতদেহ টুকুৰা টুকুৰ কৰি কুকাৰত উতলাই দিয়া বুলি আৰক্ষীক দাবী কৰা বুলি জানিব পৰা গৈছে। বিবৃতি অনুসৰি তেওঁ হাড়বোৰ পৃথক কৰি পেষ্টলেৰে পিহি পুনৰ উতলাইছিল। তিনিদিন ধৰি একাধিকবাৰ মাংস আৰু হাড় ৰান্ধি অৱশিষ্টখিনি পেক কৰি বিলত পেলোৱা বুলি জানিব পৰা গৈছে। দাবীসমূহ পৰীক্ষা কৰা হৈছে।
এই দম্পতীৰ দুটা সন্তান আছে, এজন ল’ৰা আৰু এগৰাকী ছোৱালী ৷ উল্লেখ্য যে দুয়োৰে মাজত সঘনাই কাজিয়া হৈছিল। কিয় আৰু কেনেকৈ এই হত্যাকাণ্ড সংঘটিত হ’ল সেয়া স্পষ্ট হোৱা নাই।
Continue Reading
