ডিজিটেল ডেস্কঃ প্ৰেমৰ সম্পৰ্ক এটা চলি থাকোতে প্ৰেমিকে প্ৰেমিকাক সাবটি ধৰা বা চুমা খোৱাটো কোনো অপৰাধ নহয়। মাদ্ৰাজ উচ্চ ন্যায়ালয়ে এটা গোচৰৰ শুনানি গ্ৰহণ কৰি এই ৰায় দিয়ে। ন্যায়ালয়ে কয় যে প্ৰেমত পৰা যুৱক আৰু যুৱতীৰ মাজত আলিংগন আৰু চুমা খোৱাটো স্বাভাৱিক কথা। যৌন নিৰ্যাতনৰ অভিযোগ উঠা এজন যুৱকক সকাহ দি আদালতে এই মন্তব্য কৰিছে।
আবেদনৰ শুনানি গ্ৰহণ কৰি ন্যায়াধীশ আনন্দ ভেংকটেশে কয় যে, আই পি চিৰ ধাৰা ৩৫৪-এ (১) (i)ৰ অধীনত যৌন নিৰ্যাতনৰ অপৰাধ হ’বলৈ হলে যুৱকজনে যুৱতীগৰাকীৰ সৈতে শাৰীৰিক সম্পৰ্ক কৰিব লাগিব। প্ৰেমৰ সম্পৰ্কত থকা দুজন মানুহৰ মাজত সাৱটি ধৰা বা চুমা খোৱাটো একেবাৰে স্বাভাৱিক কথা। এয়া কোনো কাৰণতে অপৰাধ নহয়।
এগৰাকী যুৱতীয়ে অভিযোগ কৰি কৈছিল যে ২০২২ চনৰ ১৩ নৱেম্বৰত তেওঁ প্ৰেমিকক কোনো স্থানত লগ কৰিছিল। ইয়াৰ পিছত দুয়োৰে মাজত কথা-বতৰা হ’ল। ইয়াৰ মাজতে যুৱকজনে যুৱতীগৰাকীক সাবটি ধৰে আৰু চুম্বন কৰে।
যুৱতীগৰাকীয়ে পিতৃ-মাতৃক এই ঘটনাৰ বিষয়ে অৱগত কৰে। ইয়াৰ পিছত যুৱকজনক যুৱতীগৰাকীক বিয়া কৰাবলৈ কোৱা হৈছিল যদিও যুৱকজনে নাকচ কৰিছিল। ইয়াৰ পিছতে যুৱতীগৰাকীয়ে যুৱকজনৰ বিৰুদ্ধে গোচৰ ৰুজু কৰে।
এই গোচৰৰ শুনানি গ্ৰহণ কৰি থকাৰ সময়তে আদালতে যুৱকজনক নিৰ্দোষী বুলি ঘোষণা কৰে। আদালতে কয় যে উত্থাপিত অভিযোগ সঁচা কিন্তু যুৱকজনৰ বিৰুদ্ধে কোনো অপৰাধমূলক গোচৰ ৰুজু কৰিব নোৱাৰিব। প্ৰেমৰ সম্পৰ্কত আলিংগন আৰু চুম্বন কেতিয়াও অপৰাধ নহয়। ইয়াত কোনো আইনী ব্যৱস্থাৰ প্ৰয়োজন নাই।
Continue Reading
