পিতৃৰ সৈতে ১৭ বছৰ বয়সত; সপ্তশৃংগ জয় কৰি গঢ়িলে বিশ্ব অভিলেখ

অভিলেখ সৃষ্টিকাৰী কিশোৰীগৰাকীৰ নাম কাম্য কাৰ্তিকেয়ন। মুম্বাইৰ বাসিন্দা কাম্যা ভাৰতীয় নৌসেনাৰ শিশু বিদ্যালয়ৰ ছাত্ৰী।তেওঁৰ পিতৃ এছ কাৰ্তিকেয়ানে ভাৰতীয় নৌসেনাত কমাণ্ডাৰ পদত কৰ্মৰত। পিতৃৰ হাতত ধৰি ১৩ বছৰ বয়সতে পৰ্বতাৰোহণৰ জগতখনত ভৰি দিছিল কাম্যাই। তেতিয়াৰ পৰাই ইটোৰ পিছত সিটো নিদৰ্শন দাঙি ধৰিছে কাম্যাই। ২০১৭ আফ্ৰিকাৰ মাউণ্ট কিলিমাঞ্জাৰো(৫৮৯৫ মিটাৰ) আৰোহণ কৰিছিল। তেতিয়াৰ পৰাই কাম্যাই চেভেন পিকছ জয় কৰাৰ সপোন দেখিবলৈ আৰম্ভ কৰে। ২০২০ চনত দক্ষিণ আমেৰিকাৰ মাউণ্ট একনকাগুয়া(৬৯৬১ মিটাৰ) জয় কৰা বিশ্বৰ আটাইতকৈ কম বয়সীয়া মহিলা হিচাপে পৰিগণিত হয়। ইয়াৰ পিছত চলিত বৰ্ষৰ মে’ মাহত বিশ্বৰ সৰ্বোচ্চ শৃংগ এভাৰেষ্ট (৮৮৪৮ মিটাৰ)জয় কৰে। সেই সময়ত ১৬ বছৰীয়া কাম্যাই নেপালৰ পৰা এভাৰেষ্ট আৰোহণ কৰা আটাইতকৈ কম বয়সীয়া মহিলা হিচাপে এক নজিৰ গঢ়ি তুলিছিল। অৱশ্যে অন্ধ্ৰ প্ৰদেশৰ ১৩ বছৰীয়া পূৰ্ণ মালবাটৰ হাতত তিব্বতৰ ফালৰ পৰা এভাৰেষ্ট আৰোহণ কৰা আটাইতকৈ কম বয়সীয়া ব্যক্তিৰ অভিলেখৰ আধিকাৰী। উল্লেখযোগ্য যে নেপালত ট্ৰেকিংৰ বাবে নূন্যতম বয়স ১৬ বছৰ৷

ইয়াৰ পিছত ৫৬৪২ মিটাৰ উচ্চতাৰ ইউৰোপৰ মাউণ্ট এলব্ৰাছ, অষ্ট্ৰেলিয়াৰ মাউণ্ট কোচিয়াজকো (২২২৮ মিটাৰ), উত্তৰ আমেৰিকাৰ মাউণ্ট ডেনালি (৬১৯৪ মিটাৰ)ত এটা এটাকৈ  জয় কৰে। ২৪ ডিচেম্বৰৰ পুৱা কাম্যাই এন্টাৰ্কটিকাৰ  ৪৮৯২ মিটাৰ উচ্চতাৰ মাউণ্ট ভিনছনৰ শিখৰত ভৰি দি সাতখন মহাদেশ ভ্ৰমণৰ অন্ত পেলায়। 

কাম্যাই সফলতাৰ পাছত মত প্ৰকাশ কৰি কয় এতিয়াও বিশ্বাস কৰিব পৰা নাই! শৈশৱৰ পৰাই সপোন দেখিছিল সপ্ত শৃংগ জয়ী হোৱাৰ। সাত বছৰ ধৰি মই নিজকে প্ৰস্তুত কৰিছিলো। প্ৰতিটো শৃংগই সাহস আৰু সহনশীলতাৰ পাঠ শিকাইছে। আশাকৰোঁ মোৰ কাহিনীয়ে আনকো অনুপ্ৰাণিত কৰিব। পিতা-পুত্ৰীৰ এই সফলতাত ভাৰতীয় নৌসেনাই দুয়োকে অভিনন্দন জনোৱাৰ লগতে। নৌসেনাৰ এক বিবৃতিত এই বিজয় কেৱল নৌসেনাৰ বাবেই নহয়, ভাৰতৰ বাবেও গৌৰৱৰ বিষয় বুলি উল্লেখ কৰে

কাম্যৰ সফলতাৰ বিষয়ে শুনি এভাৰেষ্ট আৰু সপ্তশৃংগ বিজয়ী বঙালী পৰ্বতাৰোহী সত্যৰূপ সিদ্ধান্তে কয়, ইমান কম বয়সতে এই নিদৰ্শন দাঙি ধৰাটো সঁচাকৈয়ে অবিশ্বাস্য!নতুন প্ৰজন্মৰ পৰ্বতাৰোহীসকলক দেখি দুঃসাহসিক ক্ৰীড়াক আগুৱাই নিয়াৰ দায়িত্ব সঠিক হাতত আছে বুলি উল্লেখ কৰে৷ উল্লেখযোগ্য যে সত্যৰূপ সিদ্ধান্তে ২০১৯ চনত ৩৫ বছৰ ৯ মাহ বয়সত এই অভিলেখ গঢ়িছিল।