‘পুষ্পা’ৰে পুষ্পিত আল্লু অৰ্জুন, প্ৰভাস-ৰজনীকান্তৰ দৰে তাৰকাৰ সাম্ৰাজ্যতো ছবিখনে তুলিছে খলকনি

ডিজিটেল ডেস্কঃ ‘পুষ্পা’ৰ জ্বৰত আক্ৰান্ত চলচ্চিত্ৰপ্ৰেমী। এতিয়া ছবিঘৰে ছবিঘৰে, মানুহৰ মুখে মুখে,ভিতৰে বাহিৰে কেবল এটাই নাম পুষ্পা,পুষ্পা আৰু পুষ্পা। অতি কম সময়ৰ ভিতৰতে ছবিখনে শ্ৰোতা-দৰ্শকৰ হৃদয়ত স্থান পাবলৈ সক্ষম হৈছে। কেৱল তেলেগু ভাষাতে নহয়। আল্লু অৰ্জুনৰ ছবি 'পুষ্পা: দ্য ৰাইজ'-এ হিন্দী ভাষাতো সফলতাৰ চূড়া স্পৰ্শ কৰিবলৈ সক্ষম হৈছে। স্মৰ্তব্য যে, ছবিখন হিন্দীৰ লগতে, তামিল, মালায়ালম আৰু কানাড়া ভাষাতো ডাব কৰা হৈছে। বাণিজ্য বিশ্লেষক ৰমেশ বালাই টুইট কৰি কয় যে, হিন্দীত ডাব কৰা 'পুষ্পা: দ্য ৰাইজ' ছবিখনে ১০০ কোটিৰ ঘৰ অতিক্ৰম কৰিছে। মুঠ ৫টা ভাষাত ডাব কৰা ছবিখনে ছবিগৃহত সমানে সমাদৰ লাভ কৰিছে।‘ ছবিখনে ভাৰতত মুঠ ৩১৯ কোটি টকাৰ ব্যৱসায় কৰিছে। বিদেশত ছবিখনে লাভ কৰিছে ৩৫ কোটি। সৰ্বমুঠ ৩৫৪ কোটি। কৰনা মহামাৰী চলাকালীন সময়ত ৩০০ কোটিৰ সীমা অতিক্ৰম কৰা 'পুষ্পা'ই একমাত্ৰ ছবিৰূপে বিবেচিত হৈছে। ৰমেশ বালাই টুইটত লিখিছে, ‘ এই ছবিখনৰ পাছত আল্লুৱে অন্য এক কৃতিত্ব অৰ্জন কৰিছে। কেৱল হিন্দীভাষাতে ছবিখনে ১০০ কোটিৰ ঘৰ অতিক্ৰম কৰিছে।‘ ইয়াৰ পূৰ্বে জনপ্ৰিয় ছুপাৰষ্টাৰ প্ৰভাস আৰু ৰজনীকান্তৰহে তলিকাত নাম আছিল বুলিও সদৰী কৰে ৰমেশ বালাই। ছবিখনৰ যাত্ৰাৰ ইয়াতে সামৰণি পৰা নাই। পৰিচালক সুকুমাৰে ইতিমধ্যে দ্বিতীয় ছিকুৱেলছৰ কথা ঘোষণা কৰিছেই। দ্বিতীয় খণ্ড আহিব 'পুষ্পা: দ্য ৰুল' নামেৰে। প্ৰথম খণ্ডটোতকৈ দ্বিতীয় খণ্ডটো আৰু অধিক আকৰ্ষণীয় হব বুলি জনাইছে আল্লু অৰ্জুনে। মন কৰিবলগীয়া যে, আল্লু অৰ্জুন আৰু ৰশ্মিকা মন্দনাই আকৌ এবাৰ ৰঙা চন্দন কাঠৰ চোৰাং ব্যৱসায়ী ‘পুষ্পাৰাজ’ৰ কাহিনীৰে দৰ্শকক মোহাচ্ছন্ন কৰিবলৈ সাজু হৈছে। সামান্থা প্ৰভুৱে সেই ছবিখনতো 'ইউ অন্তাভা'ৰ দৰে গীতত নৃত্য কৰাৰ সুযোগ পাব নে নাই সেয়া সময়তহে হ’ব লক্ষ্যণীয়!