উত্তৰাখণ্ডত নিষিদ্ধ হ’ব হালাল প্ৰথা, বহুবিবাহ, বাল্যবিবাহ; আইনৰ আওতালৈ লিভ-ইন সম্পৰ্ক

ধামীয়ে উমৈহতীয়া দেৱানী সংহিতা উত্তৰাখণ্ড-২০২৫ প্ৰযোজ্য কৰা সিদ্ধান্ত ঘোষণা কৰাৰ লগে লগে ইয়াৰ নিয়মাৱলী আৰু প'ৰ্টেলটো জনসাধাৰণৰ নামত উৎসৰ্গা কৰে। তেওঁ কয়, ‘এই আইনৰ জৰিয়তে সমাজত সমৰূপতা স্থাপন হ'ব আৰু সকলো নাগৰিকৰ বাবে সমান অধিকাৰ তথা দায়িত্ব থাকিব। উমৈহতীয়া নাগৰিক সংহিতাৰ অন্তৰ্গত জাতি, ধৰ্ম, লিংগ আদিৰ ভিত্তিত ভেদাভেদ সৃষ্টি কৰা ব্যক্তিগত নাগৰিকৰ সকলো বিষয়ৰ সৈতে জড়িত সংশ্লিষ্ট সকলো আইনৰ সমৰূপতা অনাৰ চেষ্টা কৰা হৈছে।' উল্লেখযোগ্য যে বিজেপিয়ে ২০২২ চনত উত্তৰাখণ্ডৰ বিধানসভাৰ নিৰ্বাচনত ইউ চি চি কার্যকৰী কৰাৰ প্ৰতিশ্ৰুতি দিছিল। ধামীয়ে দ্বিতীয়বাৰৰ বাবে ৰাজ্যখনৰ মুখ্যমন্ত্ৰীৰ পদ গ্ৰহণ কৰাৰ পাছত প্রথমখন কেবিনেট বৈঠকত ইউ চি চিৰ প্ৰস্তাৱত অনুমোদন জনায় আৰু বিশেষজ্ঞ কমিটী গঠনত সন্মতি জনাইছিল। উত্তৰাখণ্ড ইউ চি চিয়ে বিবাহ, বিবাহ বিচ্ছেদ, উত্তৰাধিকাৰ, লিভ-ইন ৰিলেশ্যনশ্বিপ আৰু ইয়াৰ সৈতে জড়িত আন বিষয়সমূহ নিয়ন্ত্ৰণ কৰিব। ইউ চি চিত সকলো ধৰ্মৰ পুৰুষ আৰু মহিলাৰ বাবে বিবাহৰ সমান সময়, বিবাহ বিচ্ছেদৰ ভিত্তি আৰু প্ৰক্ৰিয়া নিৰ্ধাৰণ কৰা হৈছে। ইয়াৰ লগতে বহুবিবাহ তথা হালালত নিষেধাজ্ঞা আৰোপ কৰা হৈছে। 

উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ ৰঞ্জনা প্রকাশ দেশাইৰ অধ্যক্ষতাত ২০২২ চনৰ ২৭ মে'ত বিশেষজ্ঞ কমিটী গঠন কৰা হৈছিল। এই আইনৰ অধীনত পুত্ৰ আৰু কন্যাই পৈতৃক সম্পত্তিত সমান অধিকাৰ লাভ কৰিব। যদি কোনো এজন ব্যক্তিৰ মৃত্যু হয় তেতিয়া তেওঁৰ সম্পত্তি পত্নী/স্বামী আৰু সন্তানৰ মাজত সমানে ভগাই দিয়াৰ অধিকাৰ দিছে ইউ চি চিয়ে। স্বামী আৰু পত্নীৰ মাজত বিবাহ বিচ্ছেদ ভিত্তি ইয়াত নিৰ্ধাৰণ কৰি দিয়া হৈছে। সেই অনুসৰি বিবাহ বিচ্ছেদৰ কাৰণ স্বামী আৰু স্ত্ৰীৰ বাবে একেধৰণৰ হ'ব লাগিব। কেৱল এটা পক্ষই দৰ্শোৱা কাৰণত বিবাহ বিচ্ছেদ হ'ব নোৱাৰিব। আনহাতে, এতিয়াৰ পৰা ৰাজ্যখনত লিভ-ইন ৰিলেশ্যনৰ কাৰণে পঞ্জীয়ন কৰাৰ প্ৰয়োজন হ'ব। যদি তেনেদৰে থকা অৱস্থাত সন্তান জন্ম হয় তেতিয়া সেই সন্তানৰ দায়িত্ব তেওঁলোকেই ল'ব লাগিব । অপৰাধ আইনত চুৰি, ডকাইতি, মাৰ-পিট, হত্যাৰ দৰে অপৰাধৰ বাবে একে ধৰণৰ আইনী ব্যৱস্থা আছে। 

ইফালে মুছলিম লীগৰ যুটীয়া সচিব মৌলানা কৌছৰ হায়াত খানে ইউ চি চিৰ বিৰোধিতা কৰিছে। তেওঁ কয় যে ইউ চি চিয়ে প্রত্যক্ষভাৱে মুছলমানসকলৰ ধৰ্মীয় বিষয়ত হস্তক্ষেপ কৰিছে আৰু হিন্দুৰ আইন জাপি দিয়াৰ চেষ্টা কৰা হৈছে। ই ইছলাম-বিৰোধী।' তেওঁ লগতে কয় যে ভাৰতৰ ৩০-৩৫ কোটি মুছলমানে ইউ চি চিৰ বিৰোধিতা কৰিছে, কিন্তু মুছলমান সমাজৰ কথা শুনা নাই ৷ অল ইণ্ডিয়া মুছলীম জামাতৰ ৰাষ্ট্ৰীয় সভাপতি মৌলানা ছাহাবুদ্দিন ৰিজভী বলেভীয়ে কয় যে ইউ চি চিয়ে শ্বৰিয়ৎ আইন উলংঘা কৰিছে। উত্তৰাখণ্ডৰ মুছলমানসকল ইয়াক মানি চলিবলৈ বাধ্য নহয়। তেওঁ কয় যে এই আইন শ্বৰিয়ত নীতি-নিয়মসমূহৰ বিৰোধী নহ'লে সকলো মুছলমানে ইয়াক মানি ল’ব, কিন্তু শ্বৰিয়তৰ বিৰোধী হ'লে ইয়াক মানি চলিবলৈ বাধ্য কৰাব নোৱাৰে ।

অচিৰেই সমগ্ৰ দেশৰ লগতে ইউ চি চি আৰু অসমতো প্রযোজ্য হ'ব। অসমৰ মুখ্যমন্ত্ৰী ড° হিমন্ত বিশ্ব শৰ্মাই কয় যে এতিয়া উত্তৰাখণ্ডত ইউ চি চি কাৰ্যকৰী হৈছে। ইয়াৰ পাছত সমগ্ৰ দেশত হ'ব। সেই তেতিয়াই সমগ্ৰ দেশৰ লগতে অসমতো ইউ চি চি প্রযোজ্য হ'ব।