ভাৰতৰ চেনাব ৰে’ল দলংঃ বিশ্বৰ আটাইতকৈ ওখ ৰে’ল দলং; কি বিশেষত্ব এই দলঙৰ...

এই ৰে’লসেতু ভাৰতীয় ৰে’লৱেৰ বাবে এক মাইলৰ খুঁটি হিচাপে প্ৰমাণিত হোৱাৰ লগতে ই বিশ্বৰ সৰ্বোচ্চ ৰে’লসেতু। জনো আহক কিয় এই দলং বিশেষত্ব...

এই প্ৰকল্পটো ভাৰতীয় ৰে’লৱেৰ অন্যতম অভিলাষী প্ৰকল্প আছিল৷ইয়াক ৰাষ্ট্ৰীয় প্ৰকল্প হিচাপে ঘোষণা কৰা হৈছিল। এই প্ৰকল্পত উধামপুৰ চহৰৰ পৰা জম্মুৰ বাৰামুল্লা জিলালৈ নতুন ৰে’লপথ নিৰ্মাণ কৰা হৈছিল। এই লাইনটোত সুৰংগ আৰু দলং নিৰ্মাণৰ কামো জড়িত আছিল, ইয়াত আটাইতকৈ গুৰুত্বপূৰিণ আছিল চেনাব নদীৰ ওপৰত থকা এই তোৰণ দলংখন। চেনাব ৰেল দলঙৰ উদ্দেশ্য আছিল কাশ্মীৰক ভাৰতীয় ৰে’লৱে নেটৱৰ্কৰ সৈতে সংযোগ কৰা, আৰু এই দলং নিৰ্মাণৰ ফলত কাশ্মীৰ ৰে’লৱে প্ৰকল্পৰ উধামপুৰ-শ্ৰীনগৰ-বাৰামুল্লা অংশৰ ১১১ কিলোমিটাৰ ৰেলপথত এক গুৰুত্বপূৰ্ণ সংযোগ সম্পূৰ্ণ হয়। এই দলং নিৰ্মাণ ভাৰতৰ প্ৰযুক্তিগত সামৰ্থ্য তথা অভিযান্ত্ৰিক দক্ষতাৰ এক উল্লেখযোগ্য নিদৰ্শন।

এই ৰে’লসেতু ভূমিকম্পপ্ৰৱণ, টেকটনিকভাৱে সক্ৰিয় অঞ্চল তথা ভূতাত্ত্বিকভাৱেও জটিল এক অঞ্চলত নিৰ্মাণ কৰা হৈছে। এই অঞ্চলটো সঘনাই ভূমিকম্পৰ দ্বাৰা প্ৰভাৱিত হয় আৰু ইয়াৰ বাবেই এই দলংখন বিশেষভাৱে ভূমিকম্প আৰু প্ৰাকৃতিক দুৰ্যোগ সহ্য কৰিব পৰাকৈ ডিজাইন কৰা হৈছিল। আই আই টি দিল্লী, আই আই টি ৰুৰকি আৰু আই আই এছ চি বাংগালুৰুৰ দৰে প্ৰধান প্ৰতিষ্ঠানসমূহে অঞ্চলটোৰ ভূমিকম্পীয় বিপদৰ বিষয়ে বিতংভাৱে অধ্যয়ন চলাইছিল। তেওঁলোকে কৰা অধ্যয়নৰ ভিত্তিত চেনাব ৰে’ল দলংখন এনেদৰে নিৰ্মাণ কৰা হৈছিল যে ই ৰিখটাৰ স্কেলত ৮ পৰ্যন্ত ভূমিকম্প, প্ৰবল বিস্ফোৰণ আৰু ঘণ্টাত ২৬০ কিলোমিটাৰ পৰ্যন্ত বতাহ সহ্য কৰিব পাৰে।এই দলং যিকোনো প্ৰাকৃতিক দুৰ্যোগৰ সময়তো সম্পূৰ্ণ সুৰক্ষিত হৈ থাকিব৷এই বৈশিষ্টই দলংখনৰ গুৰুত্ব বহুগুণে বৃদ্ধি কৰিছে৷ 

এই দলংৰ আন এক গুৰুত্বপূৰ্ণ বৈশিষ্ট হৈছে - চেনাব ৰে’ল দলঙৰ উচ্চতা ৩৫৯ মিটাৰ, যাৰ ফলত ই বিশ্বৰ সৰ্বোচ্চ ৰে’ল দলং বিচাপে পৰিগণিত হৈছে। এই দলঙৰ উচ্চতা পেৰিছৰ আইফেল টাৱাৰতকৈও অধিক, যাৰ উচ্চতা মাত্ৰ ৩৩০ মিটাৰ। ই এক আচৰিত অভিযান্ত্ৰিক কৃতিত্ব আৰু ইয়াৰ সৃষ্টি ভাৰতীয় অভিযন্তাসকলৰ কঠোৰ পৰিশ্ৰম আৰু দক্ষতাৰ ফল। এই দলংখন চেনাব নদীৰ ওপৰত নিৰ্মাণ কৰা হৈছে, যিটো ভাৰতীয় ৰে’লৱেৰ বাবে এক অতি প্ৰত্যাহ্বানমূলক প্ৰকল্প আছিল। নিৰ্মাণৰ পূৰ্বে অঞ্চলটোৰ কঠিন ভূগোল আৰু বতৰৰ পৰিস্থিতিৰ প্ৰতি লক্ষ্য ৰাখি দলংখনৰ ডিজাইন আৰু নিৰ্মাণ কৌশল এই পৰিস্থিতিৰ বাবে উপযুক্ত হোৱাটো নিশ্চিত কৰা হৈছিল।

চেনাব ৰেল দলঙৰ ডিজাইন বৃহৎ স্পেনযুক্ত একক খিলান তীখা দলঙৰ দৰে, আৰু ইয়াত বৃহৎ তীখাৰ ট্ৰাছ ব্যৱহাৰ কৰা হয়। এই দলংখনৰ নিৰ্মাণ প্ৰক্ৰিয়া আৰম্ভ হৈছিল ২০১৭ চনত, যেতিয়া ইয়াৰ ভিত্তি সমৰ্থন প্ৰস্তুত কৰা হৈছিল। ইয়াৰ পিছত মূল তোৰণৰ নিৰ্মাণ আৰম্ভ হয়, ২০২২ চনৰ আগষ্ট মাহত সমগ্ৰ দলংখন নিৰ্মাণ সম্পূৰ্ণ হয়, আৰু ইয়াক ভাৰতীয় ৰে’লৱেৰ অন্যতম বৃহৎ সফলতা বুলি গণ্য কৰা হয়। এই দলংখন কেৱল উচ্চতা আৰু ভূমিকম্পীয় ক্ষমতাৰ বাবেই নহয়, ইয়াৰ অত্যন্ত আকৰ্ষণীয় আৰু প্ৰযুক্তিগতভাৱে উন্নত ডিজাইনৰ বাবেও বিখ্যাত।

চেনাব ৰে’ল দলং কাশ্মীৰ ৰে’ল প্ৰকল্পৰ এক গুৰুত্বপূৰ্ণ অংশ হিচাপে উধামপুৰ, শ্ৰীনগৰ আৰু বাৰামুল্লাক সংযোগ কৰা এখন বৃহৎ দলং। এই দলং নিৰ্মাণে কাশ্মীৰ উপত্যকালৈ ৰে’ল সেৱা প্ৰদান কৰিব, যাৰ ফলত যাত্ৰা দ্ৰুত, সুবিধাজনক আৰু নিৰাপদ হ’ব। ইয়াৰোপৰি এই দলঙে ভাৰতীয় ৰে’লৱেকো সমৃদ্ধ কৰাৰ লগতে এক দিশ প্ৰদান কৰিব, আৰু অনাগত সময়ত ভাৰতীয় ৰে’লৱে নেটৱৰ্কৰ শক্তি বৃদ্ধি কৰিব। চেনাব ৰে’ল দলং কেৱল ভাৰতৰ বাবেই নহয় সমগ্ৰ বিশ্বৰ বাবে এক অনন্য অভিযান্ত্ৰিক কৃতিত্ব।