ডিজিটেল ডেস্কঃ ভয়ংকৰ পথ দুৰ্ঘটনাত থিতাতে মৃত্যু ৬ বন্ধু-বান্ধৱীৰ। মঙলবাৰে পুৱতি নিশা এক পথ দুৰ্ঘটনাত ৬ গৰাকী যুৱক-যুৱতীৰ মৃত্যু হোৱাৰ লগতে আন এজন গুৰুতৰভাৱে আহত হৈছিল। ভয়ংকৰ দুৰ্ঘটনাত থিতাতে নিহত হৈছিল কুণাল কুক্ৰেজা (২৩), অতুল আগৰৱালা (২৪), ঋষভ জৈন (২৪), নব্য গোৱেল (২৩), কামাক্ষী (২০) আৰু গুনীত কুক্ৰেজা (১৯)। আহত হৈছিল সিদ্ধেশ নামৰ এজন যুৱক। এই খবৰে কঁপাই গৈছে ডেৰাডুন।
এই দুৰ্ঘটনাৰ ন ন তথ্য পোহৰলৈ আহিছে।
সিদ্ধেশে নামৰ যুৱকজনে আয়োজন কৰা পাৰ্টি কৰি উভতি আহি আছিল তেওঁলোক। মাজ নিশা প্ৰায় ১.৩০ বজাত দেৰাদূনৰ ONGC চ’কত সংঘটিত হৈছিল এই পথ দুৰ্ঘটনা। এখন তীব্ৰবেগী ইন’ভা বাহনে এখন কণ্টেইনাৰ ট্ৰাকৰ পিছফালে খুন্দা মাৰিছিল। জানিব পৰা অনুসৰি এখন BMWৰ বাহনৰ সৈতে ৰেচিং কৰি গৈ আছিল দুৰ্ঘটনা সংঘটিত কৰা ইন’ভা বাহনখন। আৰু BMW বাহনখনক অতিক্ৰম কৰিবলৈ গৈ এখন ট্ৰাকত খুন্দা মাৰে। অত্যধিক তীব্ৰ গতিয়েই কাল হ'ল তেওঁলোকৰ জীৱনৰ বাবে।
দুৰ্ঘটনাটো ইমানেই ভয়ংকৰ আছিল যে দুৰ্ঘটনা পতিত হোৱা যুৱক-যুৱতীগৰাকীৰ মূৰ ফাটি-চিটি গৈছিল। দেহ খণ্ড-বিখণ্ড হৈ যায়। নিমিষতে গাড়ীখন ধ্বংসস্তুপত পৰিণত হৈছিল।
এটা ভিডিঅ’ পোহৰলৈ আহিছে য’ত আটাইকেইগৰাকীয়ে সুৰাপান কৰি থকা দেখা গৈছে। ফলত সন্দেহ কৰা হৈছে যে এই দুৰ্ঘটনাৰ আঁৰত হয়তো থাকিব পাৰে সুৰাৰ প্ৰভাৱ। মৰণোত্তৰ পৰীক্ষাৰ প্ৰতিবেদন অহাৰ পাছতহে সকলো তথ্য পৰিষ্কাৰ হৈ পৰিব। আৰক্ষীয়ে ঘটনা সন্দৰ্ভত এতিয়াও তদন্ত অব্যাহত ৰাখিছে।
Continue Reading
