ডিজিটেল ডেস্কঃ উত্তৰ প্ৰদেশৰ শ্বাহজাহানপুৰত ২৪ বছৰীয়া যুৱকে শ্লিপিং টেবলেট সেৱন কৰি আত্মহত্যাৰ চেষ্টা চলাইছিল। ইনষ্টাগ্ৰামত লাইভ কৰি এই সকলোবোৰ কৰিছিল যুৱকজনে। লগে লগে ছ’চিয়েল মিডিয়া প্লেটফৰ্ম Metaৰ পৰা উত্তৰ প্ৰদেশ আৰক্ষীলৈ সতৰ্কবাণী প্ৰেৰণ কৰা হয় আৰু আৰক্ষীয়ে ক্ষীপ্ৰ পদক্ষেপেৰে যুৱকজনৰ জীৱন ৰক্ষা কৰে। ১২ মিনিটৰ ভিতৰতে আৰক্ষীয়ে ৯ কিলোমিটাৰ দূৰৈৰ গাঁওখনত উপস্থিত হৈ যুৱকজনক চিকিৎসালয়লৈ লৈ যায়।
বৃহস্পতিবাৰে নিশা ভূদিয়া গাঁৱৰ ২৪ বছৰীয়া এজন যুৱকে ইনষ্টাগ্ৰামত লাইভ আহি শ্লিপিং টেবলেট খাই কথা পাতিবলৈ আৰম্ভ কৰে। এই ভিডিঅ’টোৰ সন্দৰ্ভত Metaৰ ছ’চিয়েল মিডিয়া চেণ্টাৰে সতৰ্কবাণী দি লগে লগে ইউ পি আৰক্ষী মুখ্য কাৰ্যালয়ক এই বিষয়ে অৱগত কৰে।
ভিডিঅ’ আৰু স্থানৰ সৈতে এই সতৰ্কবাণীটো মেটাই নিশা ১১:০৫ বজাত আৰক্ষীলৈ প্ৰেৰণ কৰে। ইয়াৰ পিছতে নিশা ১১:১৭ বজাত আৰক্ষী মুখ্য কাৰ্যালয়ৰ পৰা শ্বাহজাহানপুৰ আৰক্ষীয়ে এই তথ্য লাভ কৰে। তথ্য পোৱাৰ লগে লগে তাৎক্ষণিক ব্যৱস্থা গ্ৰহণ কৰি স্থানীয় কাটৰা আৰক্ষীৰ দলটোৱে মাত্ৰ ১২ মিনিটতে ৯ কিলোমিটাৰ দূৰৈৰ ভূদিয়া গাঁৱত উপস্থিত হয়।
এই সন্দৰ্ভত এছ পি ৰাজেশ এছে কয় যে গুগলে এই পথটোৰ বাবে ১৬ মিনিটৰ আনুমানিক হিচাপ দিছিল যদিও আমাৰ দলটোৱে তাৰ আগতেই গৈ পাইছিল। ঘটনাস্থলীতে যুৱকজনক অচেতন অৱস্থাত উদ্ধাৰ কৰে আৰক্ষীয়ে। লগে লগে তেওঁক কাটৰাৰ কমিউনিটি হেল্থ চেণ্টাৰ (চি এইচ চি)লৈ লৈ যোৱা হয়, য’ত সময়মতে চিকিৎসা কৰাৰ অন্তত তেওঁৰ জীৱন ৰক্ষা পৰে। চিকিৎসাৰ অন্তত যুৱকজনক চিকিৎসালয়ৰ পৰা মুকলি কৰি দিয়া হয়।
আৰক্ষীৰ মতে, পিতৃ-মাতৃৰ গালি-শপনিৰ বাবে যুৱকজন বিচলিত হৈছিল, যাৰ বাবেই তেওঁ এই পদক্ষেপ গ্ৰহণ কৰিছিল। আৰক্ষীয়ে যুৱকজনক আৰু তেওঁৰ পৰিয়ালক কাউন্সেলিঙৰ পৰামৰ্শ দিছে, যাতে ভৱিষ্যতে এনে ঘটনা পুনৰ নহয়। এই ক্ষেত্ৰত আৰক্ষীক সময়মতে তথ্য দিয়াৰ ক্ষেত্ৰত Metaৰ ভূমিকা গুৰুত্বপূৰ্ণ আছিল। ছ’চিয়েল মিডিয়া প্লেটফৰ্মৰ ৰিয়েল টাইম এলাৰ্ট চিষ্টেম আৰু আৰক্ষীৰ সতৰ্কতাৰ বাবেই এজন যুৱকৰ জীৱন ৰক্ষা পৰিল।
Continue Reading
