ডিজিটেল ডেস্ক: কাছাৰ জিলাৰ বৰখলাত আৰক্ষীৰ এক সফল অভিযানত বৃহৎ পৰিমাণৰ নিষিদ্ধ কফ ছিৰাপ জব্দ কৰা হৈছে। বৃহস্পতিবাৰে গভীৰ নিশা বৰখলাৰ বালাছড়া ট’লগেটত কাছাৰ আৰক্ষী আৰু বৰখলা আৰক্ষীৰ এটা যৌথ দলে গোপন সূত্ৰৰ পম খেদি এই অভিযান চলাইছিল। অভিযানকালত দলটোৱে ১৪৪ কাৰ্টন অবৈধ কফ ছিৰাপ উদ্ধাৰ কৰিবলৈ সক্ষম হয়।
আৰক্ষীৰ সূত্ৰই প্ৰকাশ কৰা অনুসৰি, জব্দ কৰা এই কফ ছিৰাপখিনিৰ ক’লা বজাৰৰ আনুমানিক মূল্য প্ৰায় ১.৫ কোটিৰ পৰা ২ কোটি টকা হ’ব। অভিযানৰ সময়ত AS-01 PC-8530 নম্বৰৰ এখন লৰি আটক কৰা হয় আৰু তন্ন তন্নকৈ তালাচী চলোৱাৰ পিছত বাহনখনৰ ভিতৰৰ পৰা এই বৃহৎ পৰিমাণৰ নিচাজাতীয় সামগ্ৰীখিনি উদ্ধাৰ হয়।
১৪৪টা কাৰ্টনত প্ৰায় ২১,৬০০ টা কফ ছিৰাপৰ বটল আছিল। আৰক্ষীয়ে ঘটনাস্থলীৰ পৰাই লৰিখনৰ চালকজনক গ্ৰেপ্তাৰ কৰাৰ লগতে তেওঁৰ জিম্মাৰ পৰা দুটা মোবাইল ফোনো জব্দ কৰিছে। বৰ্তমান চালকজনক আৰক্ষীৰ জিম্মাত ৰাখি তীব্ৰ সোধা-পোছা চলাই থকা হৈছে। প্ৰাথমিক তদন্তৰ ভিত্তিত আৰক্ষীৰ অনুমান, এই কফ ছিৰাপসমূহ অবৈধভাৱে বহিঃৰাজ্যলৈ সৰবৰাহ কৰাৰ পৰিকল্পনা কৰা হৈছিল।
এই সন্দৰ্ভত মাদকদ্ৰব্য নিয়ন্ত্ৰণ আইনৰ (NDPS Act) অধীনত এটা গোচৰ ৰুজু কৰা হৈছে। ধৃত চালকজনৰ স্বীকাৰোক্তিৰ ভিত্তিত এই আন্তঃৰাজ্যিক সৰবৰাহ চক্ৰটোৰ সৈতে জড়িত আন সতীৰ্থসকলক কৰায়ত্ত কৰিবলৈ আৰক্ষীয়ে অভিযান অব্যাহত ৰাখিছে।
শেহতীয়াকৈ দক্ষিণ অসমত নিষিদ্ধ কফ ছিৰাপৰ অবৈধ ব্যৱসায় উদ্বেগজনকভাৱে বৃদ্ধি পাইছে। ইয়াৰ প্ৰতি লক্ষ্য ৰাখি আৰক্ষী প্ৰশাসনে স্পষ্ট কৰি দিছে যে ড্ৰাগছ আৰু নিচাজাতীয় সামগ্ৰীৰ বিৰুদ্ধে চলোৱা এই কঠোৰ অভিযান অনাগত দিনত আৰু অধিক তীব্ৰতৰ কৰা হ’ব।
Continue Reading
