ধিঙৰ ডুমডুমীয়াত কুখ্যাত গৰু চোৰ হামিদ আলী আৰু ছাদ্দাম হুছেইনক আটক

ডিজিটেল ডেস্ক: ধিঙৰ ডুমডুমীয়াত চাঞ্চল্য। চুৰি গৰু বিক্ৰী কৰিবলৈ আহি ৰাইজৰ হাতত আটক দুই কুখ্যাত গৰু চোৰ। ধৃত চোৰ দুটাক চমজাই দিয়ে ডুমডুমীয়া আৰক্ষীক। পবিত্ৰ কোৰবানী ঈদ উপলক্ষে মৈৰাবাৰীৰ বাহাৰুল ইছলামে এটা গৰু ক্ৰয় কৰিছিল বজাৰৰ পৰা।

কিন্তু নিশাৰ ভিতৰতে চোৰে গৰুটো চুৰি কৰি লৈ যায়। ঘটনাৰ পিছতে ভুক্তভোগীয়ে আৰক্ষীক অৱগত কৰিছিল যদিও আৰক্ষীয়ে কোনো সন্ধান উলিয়াব পৰা নাছিল।

অৱশেষত ডুমডুমীয়া বজাৰত চুৰি গৰুটো বিক্ৰী কৰিবলৈ আনোতেই ৰাইজে হাটে-লোটে আটক কৰে দুই কুখ্যাত চোৰক। ধৃত চোৰ দুটাৰ নাম হামিদ আলী আৰু ছাদ্দাম হুছেইন ।

পিছত উত্তেজিত ৰাইজে চোৰ দুটাক ডুমডুমীয়া উপ আৰক্ষী চকীক চমজাই দিয়ে। লগতে চুৰি হোৱা গৰুটোও উদ্ধাৰ কৰিবলৈ সক্ষম হয়। ইফালে, এই ঘটনাৰ সৈতে এটা বৃহৎ গৰু চুৰি চক্ৰ জড়িত থকাৰ সন্দেহত আৰক্ষীয়ে ধৃত দুয়োকে জেৰা অব্যাহত ৰাখিছে। ঘটনাক কেন্দ্ৰ কৰি সমগ্ৰ অঞ্চলটোতে সৃষ্টি হৈছে তীব্ৰ চাঞ্চল্য।