ডিজিটেল ডেস্ক: বৰপেটা জিলাৰ বাঘবৰত সংঘটিত এক জঘন্য আৰু লোমহৰ্ষক ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে। এগৰাকী ১০ বছৰীয়া কিশোৰীক ধৰ্ষণ আৰু হত্যা কৰাৰ অভিযোগত আৰক্ষীয়ে ইতিমধ্যে তিনিজন কিশোৰক আটক কৰিছে।
সোমবাৰে বাঘবৰৰ ২ নং চাছৰা গাঁৱৰ বাসিন্দা মোকাদ্দেছ আলীৰ কন্যা তথা চতুৰ্থ শ্ৰেণীৰ ছাত্ৰীগৰাকীয়ে বিদ্যালয়লৈ গৈছিল। কিন্তু স্কুলত হঠাত গা বেয়া লাগিবলৈ ধৰাত তেওঁ আধাতে ছুটি লৈ অকলশৰে ঘৰলৈ বুলি ৰাওনা হয়। ঘৰলৈ অহাৰ পথত থকা এটা জনবসতিহীন অঞ্চলৰ মৰাপাট খেতিৰ কাষেৰে পাৰ হৈ যাওঁতেই খাপ পিটি থকা তিনি অভিযুক্তই কিশোৰীগৰাকীক বলপূৰ্বকভাৱে মৰাপাট খেতিৰ মাজলৈ টানি লৈ যায়।
তাতেই অভিযুক্ত কেইজনে কিশোৰীগৰাকীক অতি পাশৱিকভাৱে ধৰ্ষণ কৰে আৰু পিছত তেওঁ পিন্ধি থকা স্কুল ইউনিফৰ্মেৰেই ডিঙিত ফাচ লগাই নিৰ্দয়ভাৱে হত্যা কৰে।
কিশোৰীগৰাকী সময়মতে ঘৰলৈ ঘূৰি নহাত পৰিয়ালৰ লোক চিন্তিত হৈ পৰে আৰু বিচাৰ-খোচাৰ আৰম্ভ কৰে। অৱশেষত নিশাৰ ভাগত মৰাপাট খেতিৰ মাজত কিশোৰীগৰাকীৰ ৰক্তাক্ত মৃতদেহ উদ্ধাৰ হয়।
ঘটনাৰ খবৰ পোৱাৰ পিছতেই বৰপেটা জিলাৰ অপৰাধ শাখাৰ অতিৰিক্ত আৰক্ষী অধীক্ষক সমীৰণ বৈশ্য আৰু উপ আৰক্ষী অধীক্ষক ভাৰ্গিছ কুমাৰ ডেকাৰ নেতৃত্বত আৰক্ষীৰ এটা দলে ঘটনাস্থলীত উপস্থিত হৈ ক্ষিপ্ৰ তদন্ত আৰম্ভ কৰে। প্ৰাৰম্ভিক অৱস্থাত কোনো ক্লু লাভ কৰা নাছিল যদিও গভীৰ অনুসন্ধানৰ অন্তত আৰক্ষীয়ে সন্দেহবশতঃ তিনিজন কিশোৰক আটক কৰে।
তীব্ৰ জেৰাৰ অন্তত ধৃত তিনিওজন কিশোৰে আৰক্ষীৰ সন্মুখত নিজৰ অপৰাধ স্বীকাৰ কৰিছে। আটাইতকৈ চাঞ্চল্যকৰ বিষয়টো হ’ল, ধৃত তিনিজনৰ ভিতৰত এজন ভুক্তভোগী কিশোৰীগৰাকীৰ নিজা মোমায়েকৰ পুত্ৰ বুলি জানিব পৰা গৈছে।
জীৱন কি তাক বুজি উঠাৰ পূৰ্বেই এজনী ১০ বছৰীয়া কণমানিয়ে এনেদৰে কৰুণ মৃত্যুক সাৱটি ল’বলগীয়া হোৱা ঘটনাই সচেতন মহলক স্তব্ধ কৰি তুলিছে। কম বয়সীয়া কিশোৰে মিলি এনে বৰ্বৰ আৰু পাশৱিক অপৰাধ সংঘটিত কৰা ঘটনাই বৰ্তমান সমাজত কিশোৰ অপৰাধৰ (Juvenile Delinquency) এক ভয়াবহ আৰু উদ্বেগজনক ছবি উদঙাই দেখুৱাইছে। স্থানীয় ৰাইজে দোষীৰ বিৰুদ্ধে কঠোৰতম শাস্তিৰ দাবী জনাইছে। বৰ্তমানো আৰক্ষীয়ে ঘটনাটোৰ সন্দৰ্ভত আইনী প্ৰক্ৰিয়া আৰু তদন্ত অব্যাহত ৰাখিছে।
Continue Reading
