ডিজিটেল ডেস্ক : ডিব্ৰু-ছৈখোৱা ৰাষ্ট্ৰীয় উদ্যানৰ অন্যতম আকর্ষণ বন ঘৰচীয়া ঘোঁৰাৰ (Feral Horse) বাবে উদ্যানখন ক্রমাৎ এলাগী হৈ পৰিছে নেকি? উদ্যানখন এই ঘোঁৰাৰ বাবে বাসস্থানৰ উপযোগী হৈ থকা নাই নেকি? এনেধৰণৰ প্ৰশ্ন উত্থাপন হৈছে। কাৰণ উদ্যানখনৰ পৰা বহু ঘোঁৰা ব্ৰহ্মপুত্ৰ নদী পাৰ হৈ চুবুৰীয়া ৰাজ্য অৰুণাচল প্ৰদেশৰ ল'ৱাৰ দিবাং ভেলী জিলাৰ পাগলাম নামৰ ঠাইলৈ যোৱাৰ তথ্য পোহৰলৈ আহিছে।
পাগলাম অঞ্চলত ডিব্রু-ছৈখোৱা ৰাষ্ট্ৰীয় উদ্যানৰ পৰা যোৱা বন ঘৰচীয়া ঘোঁৰাৰ অপ্রত্যাশিত উপস্থিতিয়ে বন্যপ্রাণী কর্মী, পর্যটক আৰু প্রকৃতিপ্রেমীসকলৰ দৃষ্টি আকৰ্ষণ কৰিছে। পাগলামৰ স্থানীয় বাসিন্দাসকলৰ মতে, যোৱা কেইবামাহ ধৰি পাগলামৰ পৰিত্যক্ত ভূমি আৰু নদী কাষৰীয়া ঘাঁহনি অঞ্চলত কেইবাটাও দলত বিভক্ত বন ঘৰচীয়া ঘোঁৰাৰ এটা পাল দেখা পাই আহিছে। অঞ্চলটোৰ স্থানীয় বাসিন্দাসকলক ঘোঁৰাবোৰক অসুবিধা নিদিবলৈ তাৰ প্ৰকৃতিপ্রেমীসকলে আহ্বান জনাইছে।
এই ঘোঁৰাৰ উপস্থিতিয়ে অঞ্চলটোক এক ইক' টুৰিজমৰ স্থলী হিচাপে গঢ়ি তোলাৰ লগতে তেওঁলোকৰ বাবে নতুন জীৱিকাৰ সুযোগো অনাৰ সম্ভাৱনা দেখা গৈছে। ডিব্ৰু-ছৈখোৱা ৰাষ্ট্ৰীয় উদ্যানত থকা এই বন ঘৰচীয়া ঘোঁৰাবোৰ বন্যপ্ৰাণীৰ আইনৰ আওতাত নপৰে। যাৰ বাবে আজিলৈকে এই ঘোঁৰাৰ সঠিক জৰীপ হোৱা নাই। বন বিভাগে এনেবোৰ কাৰণতে ঘোঁৰাবোৰক লৈ ইমান চিন্তিত নহয়। উল্লেখযোগ্য যে ২০২৪ চনত ৰাষ্ট্ৰীয় সেউজ ন্যায়াধিকৰণে নিজাববীয়া গোচৰ লৈ ৰাষ্ট্ৰীয় উদ্যানৰ বন ঘৰচীয়া ঘোঁৰাৰ সংৰক্ষণৰ বাবে কেন্দ্ৰীয় আৰু ৰাজ্য চৰকাৰলৈ জাননী জাৰি কৰিছিল। সেউজ ন্যায়াধিকৰণে উল্লেখ কৰিছিল যে এই ঘোঁৰাই ৰাষ্ট্ৰীয় উদ্যানখনত পৰিৱেশ তন্ত্ৰটোক জীয়াই ৰাখিছে। লগতে বনভূমিত বিচৰণ কৰা সুন্দৰ দৃশ্যৰ বাবে বিশ্বৰ বিভিন্ন প্ৰান্তৰৰ পৰ্যটক আহে। ৰাষ্ট্ৰীয় উদ্যানখনত বন ঘৰচীয়া ঘোঁৰাৰ সংখ্যা হ্রাস পোৱাত উদ্বেগ প্রকাশ কৰি সেউজ ন্যায়াধিকৰণে উল্লেখ কৰিছিল যে যিহেতু ৰাষ্ট্ৰীয় উদ্যানখনত থকা ঘোঁৰাৰ নিয়মীয়া জৰীপ নহয়, যাৰ বাবে উদ্যানখনত থকা ঘোঁৰাবোৰৰ সঠিক সংখ্যা পোৱা নাযায়। অৱশ্যে এই জাননীৰ পাছতো ৰাজ্য চৰকাৰে বিশেষ ব্যৱস্থা লোৱা পৰিলক্ষিত নহ'ল। ৰাষ্ট্ৰীয় উদ্যানখনত প্ৰতিবছৰে হোৱা বানপানীৰ বাবে চাপৰিসমূহৰ ভৌগোলিক আকাৰ, আকৃতি সঘনাই সলনি হৈ থাকে। যাৰ বাবে ঘোঁৰাৰ বসতিস্থলো সলনি হয়। বিভিন্ন প্রকৃতিগত কাৰণত ঘাঁহনিৰ অভাৱো হয়। খাদ্যৰ সন্ধানত ৰাষ্ট্ৰীয় উদ্যানৰ পৰা ঘোঁৰা ওলাই যোৱাৰ তথ্য পূর্বেও পোৱা গৈছে। বানপানীৰ সময়ত বহু ঘোঁৰা উটি যোৱাৰো নজিৰ আছে। তেনে কেতবোৰ কাৰণত চুবুৰীয়া ৰাজ্য অৰুণাচলৰ পাগলামলৈ ঘোঁৰা গৈছে।
জানিব পৰা মতে, সেই অঞ্চলত বিশাল তৃণভূমি আছে। প্রকৃতি সংৰক্ষণবিদ মৃদুপৱন ফুকনে জানিবলৈ দিয়া মতে, পাগলামলৈ আগতেও ডিব্ৰু-ছৈখোৱাৰ পৰা ঘোঁৰা গৈছিল। তাৰ পৰা আকৌ ঘূৰিও আহিছিল। এতিয়া হয়তো তাতে কিছুমান ঘোঁৰা থাকিবলৈ লৈছে। তেওঁ লগতে কয় যে ৰাষ্ট্ৰীয় উদ্যানৰ পৰা এই ঘোঁৰা চুৰি হোৱাৰ বিষয়েও অভিযোগ পায়। কিন্তু কি কাৰণত চুৰি হৈছে সেয়া জানিব পৰা হোৱা নাই। উৎস: দৈনিক জনমভূমি
Continue Reading
