ডিজিটেল ডেস্কঃ উত্তৰাখণ্ডত চলি থকা ৩৮ সংখ্যক ৰাষ্ট্ৰীয় ক্ৰীড়াত অসমৰ আন্তৰ্জাতিক মহিলা চাইক্লিষ্ট চয়নিকা গগৈয়ে ৰূপৰ পদক জয়েৰে প্ৰায় ডেৰ বছৰৰ বিৰতিৰ পাছত পুনৰ ৰাষ্ট্ৰীয় স্তৰত চমক সৃষ্টিৰে প্ৰত্যাৱৰ্তন কৰিছে৷ ৰুদ্ৰপুৰত অনুষ্ঠিত চাইক্লিং প্ৰতিযোগিতাৰ দহ কিলোমিটাৰ স্কেচ ৰেছত আজি চয়নিকাই ২৫ মিনিট ১০.০২ ছেকেণ্ডৰে দ্বিতীয় স্থানত থাকি পদক অৰ্জন কৰিবলৈ সক্ষম হয়৷ কৰ্ণাটকৰ চাইক্লিষ্টে সোণ লাভ কৰাৰ বিপৰীতে ব্ৰঞ্জ অৰ্জন কৰে¸ হাৰিয়ানাই৷ উল্লেখ্য যে চয়নিকাৰ ৰূপৰ পদকৰ সৈতে অসমৰ পদকৰ সংখ্যা ১৪ টালৈ বৃদ্ধি পাইছে৷
ৰাষ্ট্ৰীয় ক্ৰীড়াত এয়া চয়নিকাৰ তৃতীয়টো পদক৷ ইয়াৰপূৰ্বে ২০২২ ৰ গুজাৰাট ৰাষ্ট্ৰীয় ক্ৰীড়াত দুটা ৰূপৰ পদক লাভ কৰিছিল চয়নিকাই৷ সেইবাৰো দহ কিলোমিটাৰ স্কেচ ৰেছতে ৰূপ জয় কৰা অসম কন্যাই আনটো ৰূপ ৮৫ কিলোমিটাৰ ৰ’ড ৰেছত অৰ্জন কৰিছিল৷ আনহাতে, এছিয়ান চাইক্লিং চেম্পিয়নশ্বিপতো প্ৰথম অসমীয়া চাইক্লিষ্টৰূপে পদক লাভ কৰা চয়নিকাই অহা পাঁচ ফ্ৰেব্ৰুৱাৰীত পুনৰ পদক জয়ৰ লক্ষ্যৰে নতুন ইভেণ্ট ওমনিঅ’নত অৱৰ্তীৰ্ণ হ’ব৷
ইফালে, আজিৰ দিনটোতে অসমে আৰু ছটা পদক জয় কৰাটো নিশ্চিত হৈ পৰিছে৷ ডেৰাডুনত চলি থকা লনবলৰ প্ৰথম ছটা ইভেণ্টৰ গ্ৰুপ মেচৰ অন্তত অসমে আটাইকেইটাতে ছেমিফাইনেলত প্ৰৱেশ কৰি পদক জয় নিশ্চিত কৰিছে৷ অৱশ্যে কি পদক লাভ কৰে সেয়া কাইলৈৰ ছেমিফাইনেললৈ অপেক্ষা কৰিব লাগিব৷
ইফালে, প্ৰথমবাৰৰ বাবে ৰাষ্ট্ৰীয় ক্ৰীড়ালৈ যোগ্যতা অৰ্জন কৰা অসমৰ নৱাগত পুৰুষ বক্সাৰ গৌৰৱ মজুমদাৰে ৫-০ ৰ জয়ৰে অভিযান আৰম্ভ কৰি ৫১ কিলোগ্ৰাম শাখাৰ কোৱাৰ্টাৰ ফাইনেলত প্ৰৱেশ কৰিছে৷ কিন্তু ইতিমধ্যে ছেমিফাইনেলত প্ৰৱেশ কৰা অসমৰ পুৰুষ ফুটবল দলে আজি গ্ৰুপৰ অন্তিম মেচত মিজোৰামৰ বিৰুদ্ধে ৩-০ গলৰ ব্যৱধানত পৰাস্ত হয়৷ অহা পাঁচ ফেব্ৰুৱাৰীত হ’বলগা ছেমিফাইনেলত অসম দিল্লী বা কেৰালাৰ মুখামুখি হ’ব৷
ইফালে, বিগত গোৱা ৰাষ্ট্ৰীয় ক্ৰীডাত সোণসহ তিনিটা পদক পোৱা অসম বেডমিণ্টন দলে এবাৰ মহিলাৰ দলীয় ব্ৰঞ্জ লাভ কৰিয়ে অভিযান সামৰিলে৷ আজি মহিলাৰ একক শাখাৰ কোৱাৰ্টাৰ ফাইনেলত ঈশাৰাণী বৰুৱা আৰু পুৰুষৰ ডাবলছ শাখাৰ কোৱাৰ্টাৰ ফাইনেলত সুৰজ গোৱালা-ৰঞ্জন বুঢ়াগোহাই যুটিয়ে প্ৰথম ছেট জয় কৰাৰ পাছতো পৰাস্ত হৈ বিদায় লয়৷ একেদকে সাঁতোৰত আজি পুনৰ বিফল হয় অসমৰ খেলুৱৈ৷
ৰাষ্ট্ৰীয় ক্ৰীড়াত কাইলৈ পদক নিশ্চিত কৰাৰ লক্ষ্যৰে ৰিঙত নামিব অলিম্পিক পদকজয়ী মহিলা বক্সাৰ লাভলীনা বৰগোঁহায়ে৷ মহিলা বক্সিঙৰ ৭৫ কিলোগ্ৰাম শাখাৰ কোৱাৰ্টাৰ ফাইনেল খেলিব লাভলীনাই৷ ইফালে, পুৰুষৰ ৭১ কিলোগ্ৰাম শাখাত কোৱাৰ্টাৰ ফাইনেল খেলিব অসমৰ নবাগত বক্সাৰ অভিনৱ শইকীয়াই৷
Continue Reading
