৭ বছৰৰ পাছত জামিন লাভ দেশ কঁপাই যোৱা শ্বীনা বৰা হত্যাকাণ্ডৰ মূল অভিযুক্ত ইন্দ্ৰাণী মুখাৰ্জীৰ

প্ৰথম স্বামীৰ কন্যা ২৫ বছৰীয়া শ্বীনা বৰাৰ হত্যাকাণ্ডৰ গোচৰত ২০১৫ চনত ইন্দ্রাণী মুখাৰ্জীক গ্ৰেপ্তাৰ কৰিছিল মুম্বাই আৰক্ষীয়ে। পৰৱৰ্তী তিনি মাহৰ অন্তত ইন্দ্ৰাণী মুখাৰ্জীৰ স্বামী পিটাৰ মুখাৰ্জীকো ইন্দ্ৰাণীক হত্যাকাণ্ডত সহায় কৰাৰ অভিযোগত গ্ৰেপ্তাৰ কৰা হয়। আনহাতে কাৰাগাৰত থাকোতেই ইন্দ্ৰাণী আৰু পিটাৰ মুখাৰ্জীৰ ১৭ বছৰীয়া বৈবাহিক সম্পৰ্কৰ সমাপ্তি ঘটে আৰু ২০১৯ চনত দুয়োৰে আইনীভাৱে বিবাহ বিচ্ছেদ হয়।আনহাতে, এটা পৃথক গোচৰত ইন্দ্ৰাণী মুখাৰ্জীৰ গাড়ীচালকক গ্ৰেপ্তাৰ কৰাৰ লগে লগে হত্যাকাণ্ডৰ সমস্ত বিষয় উন্মোচিত হৈছিল। শ্যামবৰ ৰায়কো গোচৰটোৰ সৈতে অভিযুক্ত বুলি অভিহিত কৰা হৈছিল। 

শ্বীনা বৰাক ইন্দ্ৰাণীয়ে তেওঁৰ চালক আৰু তেওঁৰ দ্বিতীয় স্বামী সঞ্জীৱ খান্নাৰ সহায়ত হত্যা কৰিছিল বুলি চিবিআইয়ে তথ্য দাখিল কৰে। শ্বীনা বৰাৰ মাতৃ ইন্দ্ৰাণী মুখাৰ্জীৰ সাংসাৰিক জীৱন পূৰ্বৰে পৰা যথেষ্ট বিতৰ্কিত আছিল। নিজ কন্যা শ্বীনা বৰাক হত্যা কৰি ইন্দ্ৰানী মুখাৰ্জী দেশজুৰি চৰ্চিত হৈছিল । চি বি আই তদন্তৰ সময়ছোৱাত হত্যাৰ কাৰণ সন্দৰ্ভত সোধপোছ কৰাত ইন্দ্ৰাণী মুখাৰ্জীয়ে কয় যে তৃতীয় স্বামী পিটাৰ মুখাৰ্জীৰ পুত্ৰ ৰাহুল মুখাৰ্জীৰ সৈতে শ্বীনা বৰাৰ প্ৰেমৰ সম্পৰ্ক আছিল, যাৰবাবে তেওঁ নিজ কন্যাক হত্যা কৰে। চি বি আইৰ তদন্ত অনুসৰি, ইন্দ্ৰাণী মুখাৰ্জীয়ে শ্বীনা বৰাক নিজৰ ভগ্নী বুলিহে লোকচক্ষুৰ সন্মুখত চিনাকী কৰাই দিছিল। পিছত শ্বীনা বৰাই মাকৰ বিভিন্ন কৰ্মকাণ্ড সকলোৰে মাজত জনাই দিয়াৰ ভাবুকি প্ৰদান কৰিছিল। যাৰ পৰা বাচিবৰ বাবে ইন্দ্ৰাণীয়ে নিজ কন্যাক হত্যা কৰিছিল। 

আনহাতে CBIএ উচ্চতম ন্যায়ালয়ত (Supreme Court) শ্বীনা বৰা হত্যা গোচৰৰ মূল অভিযুক্ত ইন্দ্ৰাণী মুখাৰ্জীৰ জামিন আবেদনৰ তীব্ৰ বিৰোধিতা কৰিছিল। চিবিআইয়ে ইয়াৰ শপতনামাত দাবী কৰিছে যে ইন্দ্ৰাণীয়ে তেওঁৰ নিজৰ জীয়েকক হত্যা কৰাৰ জঘন্য অপৰাধ সংঘটিত কৰিছে। তেওঁ তেওঁৰ পুত্ৰক হত্যা কৰিবলৈও চেষ্টা কৰিছিল আৰু এনেধৰণৰ অপৰাধ কৰাজনক কোনো ৰেহাই দিব নোৱাৰি। তেওঁ জামিন পোৱা উচিত নহয়।

আৰু পঢ়কঃ অদ্ভূত প্ৰেম! ২১ বছৰ পত্নীৰ মৃতদেহৰ সৈতে বাস পতিৰ, মৃতদেহৰ সৈতে পাতে কথা