সাংবাদিকক অত্যাচাৰ ত্ৰিপুৰা আৰক্ষীৰ: ছাৰ বুলি নমতাৰ অভিযোগ

ডিজিটেল ডেস্ক: দেশত পুনৰ সংঘটিত হৈছে সাংবাদিক নিগ্ৰহৰ ঘটনা৷ এইবাৰ ত্ৰিপুৰাত আৰক্ষীৰ ৰোষৰ বলি হ’ল সাংবাদিক৷ সাংবাদিকৰ কণ্ঠ স্তব্ধ কৰিব বিচৰাটো কোনো নতুন কথা নহয়৷ সম্প্ৰতি তেনে পৰিৱেশ সুলভ আৰু পূৰ্বতকৈ অধিক হোৱা পৰিলক্ষিত হৈছে৷ তাৰ মাজতে ত্ৰিপুৰাত সংঘটিত এক ঘটনাই সৃষ্টি কৰিছে তীব্ৰ চাঞ্চল্যৰ৷ উত্তৰ-পূৰ্বাঞ্চলৰ জনপ্ৰিয় ছেটেলাইট নিউজ চেনেল ‘NE NEWS’ৰ সাংবাদিক নিতাই দে’ক গ্ৰেপ্তাৰ কৰিছে ত্ৰিপুৰা আৰক্ষীয়ে৷ 

ত্ৰিপুৰা আৰক্ষীয়ে সাংবাদিকগৰাকীক গ্ৰেপ্তাৰ কৰাৰ পাছত ত্ৰিপুৰাৰ লগতে প্ৰতিক্ৰিয়াৰ সৃষ্টি হৈছে অসমতো৷ পূব আগৰতলাৰ বিতৰ্কিত ভাৰপ্ৰাপ্ত আৰক্ষী বিষয়া অৰিন্দম ৰয়ৰ ৰোষত পৰিছিল ‘NE NEWS’ৰ সাংবাদিক নিতাই দে’৷ পেট্ৰ’ল-ডিজেলৰ নাটনি সন্দৰ্ভত সাংবাদিকগৰাকীয়ে কৰিছিল সংবাদ পৰিৱেশন৷ সংবাদ সংগ্ৰহ কৰাৰ সময়ত বিতৰ্কিত আৰক্ষী বিষয়া অৰিন্দম ৰয়ক ‘দাদা’ বুলি সম্বোধন কৰাৰ বাবে আটক কৰা হৈছিল নিতাই দে’ক৷

বৰ্তমান চিজেএম ক’ৰ্টত হাজিৰ কৰোৱা হৈছে সাংবাদিক নিতাই দে’ক। আৰক্ষী চকীত ত্ৰিপুৰা আৰক্ষীয়ে বন্দুকৰ কুন্দা আৰু হেলমেটেৰে প্ৰহাৰ কৰি সাংবাদিকগৰাৰী অকথ্য নিৰ্যাতন চৱোৱাৰ অভিযোগ উঠিছে৷ ত্ৰিপুৰা আৰক্ষীৰ এই কাণ্ডক নিন্দা কৰিছে ‘অল ইণ্ডিয়া জাৰ্নেলিষ্ট ফেডাৰেচন’-এ৷ আৰক্ষীৰ বিৰুদ্ধে প্ৰতিবাদত সৰব হৈছে ‘অল ইণ্ডিয়া জাৰ্নেলিষ্ট ফেডাৰেচন’৷