ইণ্ডিয়ান ইণ্ডিপেণ্ডেন্ট ফিল্ম ফেষ্টিভেলত 'অনসুনী চীখে'লৈ শ্রেষ্ঠ চুটি ছবিৰ বঁটা

ডিজিটেল ডেস্ক : অসমীয়া চুটি ছবি 'অনসুনী চীখে'ই ৰাষ্ট্ৰীয় আৰু আন্তঃৰাষ্ট্ৰীয় চলচ্চিত্র জগতত বিশেষ চর্চা লাভ কৰি ইতিমধ্যে বিশ্বব্যাপী স্বীকৃতি লাভ কৰিবলৈ সক্ষম হৈছে।

ড° পাৰ্থসাৰথি মহন্তই ৰচনা তথা পৰিচালনা কৰা আৰু মীনা মহন্ত, ইন্দ্ৰাণী বৰুৱাই প্ৰযোজনা কৰা এই চুটি ছবিখনে অলপতে কলকাতাত অনুষ্ঠিত ইণ্ডিয়ান ইণ্ডিপেণ্ডেন্ট ফিল্ম ফেষ্টিভেলত (মে'-জুন ২০২৫)ত শ্রেষ্ঠ চুটি ছবিৰ বঁটা লাভ কৰে।

বলিষ্ঠ কাহিনী আৰু কাৰিকৰী উপস্থাপনৰ বাবে চুটি ছবিখনে এই সন্মান লাভ কৰিছে। অভিনেত্রী সীমা বিশ্বাসৰ একক অভিনয়ে চুটি ছবিখনৰ কাহিনীক গভীৰতা প্ৰদান কৰাৰ লগতে বর্ণনাত্মক দিশটোক অধিক মনোগ্ৰাহী কৰি তুলিছে। চলিত বছৰটোৰ আৰম্ভণিতে ১৭-২১ জানুৱাৰীত জয়পুৰ আন্তঃৰাষ্ট্ৰীয় চলচ্চিত্র মহোৎসৱৰ ৱৰ্ল্ডবুড ইণ্টাৰনেশ্যনেল পানোৰামা (আন্তঃৰাষ্ট্ৰীয় প্রতিযোগিতা শ্রেণী)ত এই চুটি ছবিখন নির্বাচিত হৈছিল আৰু দুটা শীর্ষ সন্মান লাভ কৰিছিল (শ্রেষ্ঠ অভিনেত্রী সীমা বিশ্বাস আৰু চুটি ছবি শ্রেণীত শ্রেষ্ঠ পৰিচালক ড° পাৰ্থসাৰথি মহন্ত)।

আনহাতে চলিত বর্ষত দিল্লী চুটি চলচ্চিত্র মহোৎসৱতো ছবিখনে শ্রেষ্ঠ চুটি ছবিৰ সন্মান লাভ কৰি সমকালীন ভাৰতীয় চলচ্চিত্ৰৰ এক উল্লেখযোগ্য সৃষ্টি হিচাপে স্থান দখল কৰিছে। এটা গুৰুত্বপূৰ্ণ মাইলষ্টোন হিচাপে, ছবিখন সম্প্রতি কান চলচ্চিত্ৰ মহোৎসৱৰ মার্চে ডু ফিল্ম (অনলাইন শাখা)ত দেখুওৱা হৈছিল। য'ত মর্মস্পর্শী বিষয়বস্তু আৰু কাহিনী বৰ্ণনাৰ বাবে বিশ্বব্যাপী দর্শকে ছবিখনক অতি উচ্চ প্রশংসা কৰিছিল। সমালোচকসকলৰ মতে সূক্ষ্ম পৰিচালনা, শক্তিশালী একক অভিনয় আৰু বিশ্বজনীন আৱেদনেৰে 'অনসুনী চীখে'ই অসমীয়া আৰু ভাৰতীয় চুটি ছবিৰ মান উন্নত কৰি বিশ্বৰ মঞ্চ অধিকাৰ কৰিবলৈ সক্ষম হৈছে।

উৎসঃ দৈনিক জনমভূমি