ডিজিটেল ডেস্কঃ তামিলনাডুৰ ৰাজনীতিত এক নতুন ইতিহাসৰ সূচনা কৰি আজি জনপ্ৰিয় অভিনেতা তথা TVK দলৰ মুৰব্বী থালাপতি বিজয়ে ৰাজ্যখনৰ নতুন মুখ্যমন্ত্ৰী হিচাপে শপত গ্ৰহণ কৰে। চেন্নাইত আয়োজিত এক বিশাল শপত গ্ৰহণ অনুষ্ঠানত হাজাৰ হাজাৰ সমৰ্থকৰ জয়ধ্বনিৰ মাজত তেওঁ শপত লয়।
এই ভব্য অনুষ্ঠানত ৰাষ্ট্ৰীয় ৰাজনীতিৰ অন্যতম শক্তিশালী নেতা ৰাহুল গান্ধী উপস্থিত থাকি বিজয়ক শুভেচ্ছা জনায়। ৰাহুল গান্ধীৰ উপস্থিতিয়ে দক্ষিণ ভাৰতৰ ৰাজনীতিত এক নতুন সমীকৰণৰ ইংগিত দিছে বুলি চৰ্চা চলিছে। ইয়াৰ উপৰিও চলচ্চিত্ৰ জগতৰ বহু তাৰকাই এই অনুষ্ঠানত অংশগ্ৰহণ কৰে, যাৰ ভিতৰত বিশেষভাৱে চকু নিৱদ্ধ আছিল জনপ্ৰিয় অভিনেত্ৰী তৃষা কৃষ্ণনৰ ওপৰত।
দীৰ্ঘদিন ধৰি ৰূপালী পৰ্দাত ৰাজত্ব কৰাৰ পিছত বিজয়ে তেওঁৰ ৰাজনৈতিক দল TVK-ৰ জৰিয়তে এইবাৰ নিৰ্বাচনত অবতীৰ্ণ হৈছিল। তেওঁৰ জনহিতকৰ কাম-কাজ আৰু শক্তিশালী জনপ্ৰিয়তাই তেওঁক এই ঐতিহাসিক বিজয়ত সহায় কৰে। শপত গ্ৰহণৰ পাছত সংবাদ মাধ্যমৰ আগত বিজয়ে কয় যে তেওঁৰ চৰকাৰে দৰিদ্ৰ জনসাধাৰণৰ কল্যাণ আৰু দুৰ্নীতিমুক্ত শাসনৰ ওপৰত গুৰুত্ব দিব।
বিজয়ৰ এই অভিষেকৰ পাছতেই সমগ্ৰ তামিলনাডুৰ লগতে দেশৰ বিভিন্ন প্ৰান্তত থকা তেওঁৰ অনুৰাগীসকলৰ মাজত আনন্দৰ জোৱাৰ উঠিছে। ৰাজ্যখনৰ বিভিন্ন স্থানত আতচবাজী ফুটাই আৰু মিঠাই বিতৰণ কৰি এই বিজয় উদযাপন কৰা হৈছে।
কেৱল এজন অভিনেতা হিচাপেই নহয়, এতিয়া এজন শাসক হিচাপে থালাপতি বিজয়ে তামিলনাডুৰ ভৱিষ্যত কেনেকৈ গঢ়ি তোলে, সেয়া হ’ব লক্ষ্যণীয়।
Continue Reading
