ডিজিটেল ডেস্কঃ ভাৰতীয় দলৰ তাৰকা বলাৰ মহম্মদ ছামীয়ে তেওঁৰ ব্যক্তিগত জীৱনক লৈ প্ৰায়ে বাতৰিৰ শিৰোনাম দখল কৰি আহিছে। ২০১৮ চনত ছামীৰ পত্নী হাছিন জাহানে ক্ৰিকেটাৰগৰাকীৰ বিৰুদ্ধে গুৰুতৰ অভিযোগ উত্থাপন কৰি সম্পৰ্ক বিচ্ছেদ কৰিছিল। ইয়াৰ পিছত ছামীয়ে নিজৰ কন্যা আয়ৰা (বেবো)ক লগ কৰিবলৈ হাহাকাৰ কৰে। কিন্তু এতিয়া তেওঁৰ ভাগৰুৱা চকু দুটাই সকাহ পালে আৰু ছোৱালীজনীক লগ পোৱাৰ পিছত ছামীক আৱেগিক যেন দেখা গ’ল। নিজ কন্যাক দেখা পাই আবেগিক হৈ পৰিল ছামী আৰু তেওঁক সাৱটি ধৰিলে। বৰ্তমান এই ভিডিঅ’ ভাইৰেল হৈ পৰিছে ছ’চিয়েল মিডিয়াত।
পুত্ৰীক লগ পোৱাৰ পিছত মহম্মদ ছামীক অতি আৱেগিক যেন লাগিল। বছৰ বছৰ পিছত কন্যাক লগ পোৱাৰ ভিডিঅ’ ইনষ্টাগ্ৰামত ভাইৰেল হৈ পৰিছে। আয়ৰাও দেউতাকক লগ পোৱাৰ পিছত বৰ সুখী যেন লাগিল আৰু তেওঁলোকে শ্বপিং মলত বহুতো বজাৰ কৰে। ২০১৮ চনত যেতিয়া ছামী আৰু হাছিন জাহানৰ বিচ্ছেদ ঘটিছিল, তেতিয়া আয়ৰা বহুত সৰু আছিল। বহুবাৰ আয়ৰাক মনত পেলাই কেমেৰাত ছামীক দুখী যেন দেখা গৈছিন। তেওঁ লগতে উল্লেখ কৰিছিল যে তেওঁৰ পত্নীয়ে আয়ৰাক লগ কৰাবলৈ অমান্তি হৈছিল । অৱশ্যে এতিয়া বহু বছৰৰ অন্তত নিজ কন্যাক দেখাৰ পিছত ছামীৰ মুখত শিথিল হাঁহি এটা দেখা গ’ল।
ভিডিঅ’টো শ্বেয়াৰ কৰি তেওঁ লিখিছে, ‘‘বহু দিনৰ মূৰত যেতিয়া তাইক দেখিলো, মোৰ সময় স্তব্ধ হৈ গ’ল। মই তোমাক ইমান ভাল পাওঁ যে শব্দৰে প্ৰকাশ কৰিব নোৱাৰোঁ বেবো।’’
ছামী বৰ্তমান ছুটীত আছে, আঘাতৰ বাবে তেওঁ এতিয়াও ভাৰতীয় দললৈ ঘূৰি অহা নাই। এতিয়া নিউজিলেণ্ডৰ বিৰুদ্ধে টেষ্ট ছিৰিজত ছামীৰ প্ৰত্যাৱৰ্তনৰ বিষয়ে জল্পনা-কল্পনাৰ সৃষ্টি হৈছে। কি শৈলীত ছামীয়ে কামবেক কৰে সেয়া চাবলৈ আগ্ৰহী ক্ৰিকেট অনুৰাগীসকল। অহা ১৬ অক্টোবৰৰ পৰা আৰম্ভ হ’ব ভাৰত আৰু নিউজিলেণ্ডৰ মাজত ছিৰিজ।
Continue Reading
